Tshawb Xyuas Neeg Xauj Tsev

Coob tug tswv tsev siv cov koomhaum tshawb xyuas neeg xauj tsev los kuaj cov neeg xauj tsev.  Cov koomhaum tshawb xyuas neeg xauj tsev muab ntaub ntawv sau txog cov neeg xauj tsev thiab lawv muab muag rau cov tswv tsev.  Lawv kuaj tej yam xws li: 

• Seb koj puas muaj rooj plaub raug ntiab tawm tsev
• Koj cov chaw nyob 3 xyoos yav tas
• Cov tswv tsev qub hais dabtsi txog koj
• Koj qhov keebkwm tiv nuj nqi saib seb puas muaj cov nuj nqi tsis them
• Seb koj puas muaj keebkwm raug txim

Nco Cia: Yog koj yog tus neeg xauj tsev hauv Minneapolis, cov ntaub ntawv sau txog koj uas tej co tswv tsev siv tau thaum tshawb xyuas neeg xauj tsev hloov xyoo no lawm. Lub zos muaj ntaub ntawv hauv ntawm www2.minneapolismn.gov/business-services/licenses-permits/rental-licenses/renter-protections/renter-screening/

Feem ntau, cov tswv tsev muaj ib tug nqi ua ntawv xauj tsev. Yog tus tswv tsev kom them nqi ua daim ntawv xauj tsev, lawv yuav tsum qhia koj tias lawv saib dabtsi thaum txiav txim siab seb xauj rau koj los tsis xauj.  Tej yam lawv saib yog xws li keebkwm tiv nqi, lossis keebkwm xauj tsev, lwm yam. 

Yog tsis yuav koj daim ntawv xauj tsev, feem ntau, tsis tau koj qhov nyiaj ua ntawv xauj tsev rov qab.  Tabsis tus tswv tsev yuav tsum muab koj qhov nyiaj ua ntawv xauj tsev rov qab yog tias:

• Lawv tsis siv nws los yuav ntaub ntawv tshawb xyuas, keebkwm tiv nqi, lossis kuaj cov neeg paub koj
• Muab lub tsev kem rau tus neeg ua ntawv xauj tsev ua ntej koj lawm
• Lawv tsis yuav koj daim ntawv xauj tsev raws li cov txheej txheem lawv tsis tau qhia koj ua ntej koj ua daim ntawv

Cov koomhaum tshawb xyuas neeg xauj tsev tsuas qhia tau nuj nqi tsis them thiab raug ntiab tawm tsev mus txog 7 xyoo. Kev nyiaj txiag poob tas qhia mus txog 10 xyoo.  Raug txim qhia tau mus tas sim neej, tabsis raug ntes thiab lwm yam tub ceevxwm ntaub ntawv qhia mus txog 7 xyoo.

Raug ntiab tawm tsev (tej zaum hu uas nyob tsis raws kevcai lossis UDs) qhia mus txog 7 xyoo ntawm cov koomhaum tshawb xyuas neeg xauj tsev. Rooj plaub ntiab tawm tsev yog keebkwm pejxeem saib tau. Nws tshwm haum koj daim ntawv kuaj neeg xauj tsev. Nws yeej tshwm txawm hais tias koj yeej rooj plaub, hais rooj plaub sib haum, lossis them tagnrho cov nqi tsev koj tiv lawm. Tej zaum koj muaj feem mus nrog tus tswv tsev sib kho kom muab npog tsis qhia luag tej yog tus tswv tsev pom zoo. 

Nco Cia:  Raug ntiab tawm tsev tshwm tau hauv tsev hais plaub cov ntaub ntawv sawvdaws pom ntev tshaj 7 xyoo. 

Yog Tsev Hais Plaub muab koj rooj plaub ntiab tawm tsev tshem tawm, cov koomhaum tshawb xyuas neeg xauj tsev qhia tsis tau txog lawm.  Thaum muab rooj plaub tshem tawm lawm, Tsev Hais Plaub muab nws lwv tawm tsis pub neeg pom lawm. 

Phib lub Ib Hlis hnub tim 1, 2024: lub xeev ib txoj kevcai tshiab hais tais tagnrho cov rooj plaub ntiab tawm tsev yuav muab kaw tsis pub neeg paub 3 xyoos tom qab lub tsev hais plaub hais kom ntiab tawm tsev. 

Yog xav paub thov kom lub Tsev Hais Plaub muab tshem tawm, thiab yuav qhia cov koomhaum tshawb xyuas neeg xauj tsev thaum muab rooj plaub tshem tawm lawm, saib peb daim ntawv tseeb Tshem Tawm Rooj Plaub Raug Ntiab Tawm Tsev.

Koj sau tau ib co lus piav txog qhov raug ntiab tawm tsev rau hauv daim ntawv sau nyob hauv koj qhov ntaub ntawv tshawb xyuas.  Piv txws, koj piav tias koj poob haujlwm es them tsis tau nqi tsev, tabsis koj twb ua haujlwm txij thaum ntawv los lawm.  Lossis koj piav tias muaj ib tug ua qhov teebmeem, tabsis tus neeg ntawd tsis nrog koj nyob lawm.  Qhia yam hloov hauv koj lub neej lawm es qhov ua rau koj raug ntiab ntawm tsev yuav tsis muaj lawm. 

Lub koomhaum tshawb xyuas neeg xauj tsev yuav tsum muab koj cov lus nrog cov ntawv ntsiab lawv xa tawm txog koj.  Koj hais tau kom lub koomhaum tshawb xyuas neeg xauj tsev xa koj cov ntaub ntawv mus rau cov tswv tsev uas tau txais ntawv txog koj 6 lub hli yav dhau los. 

Tus tswv tsev yuav tsum qhia lub khoomhaum tshawb xyuas neeg xauj tsev lub npe, chaw nyob thiab xov tooj thaum koj ua ntawv xauj tsev.  Tus tswv tsev muab daim ntawv sau txog koj rau koj saib yog tias lawv xav ua li ntawd.  Lub koomhaum txwv tsis tau kom tus tswv tsev tsis txhob pub koj saib. 

Yog tus tswv tsev tsis kam luam ib daim rau koj, ces koj mus kom lub koomhaum tshawb xyuas neeg xauj tsev muaj rau koj.  Tej zaum koj yuav tau daim ntawv sau txog koj tamsim ntawv online.  Mus xyuas lub koomhaum qhov vas sab sau tom kawg ntawm daim ntawv qhia no.  Lossis muab daim ntawv los nrog daim no sau xa mus rau lub koomhaum.  Ntxiv ntawd, muab koj daim duab ID (xeev lossis nroog ID lossis daim ntawv tsav tsheb) luam ob sab thiab xa nrog. Muab daim ntawv koj xa mus luam ib daim khaws cia thiab sau hnub tim koj xa mus.  Lub koomhaum yuav tsum xa koj daim ntawv tuaj rau koj 5 hnub tom qab lawv txais tau koj daim ntawv.  

Daim ntawv yog dawb yog tias: 

• Tsis txais koj nyob ib qho chaw, lossis koj tus nqi tsev lossis nqi cas nyiaj nce 30 hnub tas los no vim daim ntawv sau txog koj lossis
   
• Koj tsis muaj haujlwm tabsis tab tom ua ntawv nrhiav haujlwm rau 60 hnub tom ntej no lossis
   
• Koj tau kev pab tsoom fwv, xws li SSI, RSDI, MFIP, GA, Nyiaj Muas Noj, lossis
   
• Koj xav tias daim ntawv sau txog koj muaj tej yam yuam kev vim tsis muaj tseeb

Tsis yog li ntawd, tej zaum yuav tau them tus nqi me me.  Qhov no yog nyob ntawm lub koomhaum.

Tom qab lub koomhaum txais tau koj daim ntawv thiab duab ID, lawv muaj 5 hnub los xa rau koj: 

1. Tagnrho cov ntaub ntawv muaj txog koj lub sijhawm thaum koj ua ntawv thov (feem ntau, qhov no yog cov ntawv sau rau hauv daim ntawv tshawb xyuas neeg xauj tsev)

2. Lawv tau cov ntaub ntawv no qhov twg los (npe, xov tooj, thiab chaw nyob ntawm cov neeg qhia cov lus txog koj no)

3. Tagnrho cov tswv tsev npe uas tau txais daim ntawv sau txog koj rov 1 xyoo dhau thiab

4. Ib daim ntawv qhia txog koj cov cai. 

Koj muaj cai los kho tej yam yuam kev.

• Sau ntawv mus qhia lub koomhaum tshawb xyuas neeg xauj tsev tias cov lus sau yuam kev lawm.  Koj yim sau piav ntxaws yim zoo xwb.  Piv txwv, yog qhov raug ntiab tawm tsev hauv daim ntawv sau tsis yog koj li, qhia lawv koj nyob qhov twg thaum qhov raug ntiab tawm tsev ntawd tshwm sim.  Khaws ib daim ntawv rau koj tus kheej.

• Lub koomhaum yuav tsum kuaj txhua yam koj hais tias tsis yog.  Lawv hais tsis tau kom koj them rau qhov no.  Lawv yuav tsum kho daim ntawv sau txog koj thiab nrho tawm cov lus lawv tsis muaj povthawj tias muaj tseeb tsis pub dhau 30 hnub tom qab txais tau koj daim ntawv. 

• Lub koomhaum tsis kam kuaj tau yog tias koj tsis muab lus ntxaus.  Lub koomhaum yuav tsum qhia koj yog tias lawv tsis kam kuaj.  Yog ua li ntawd, xa ib daim ntawv qhia ntxiv kom ntxaws tshaj.

• Thaum lub koomhaum tshawb xyuas tag, lawv yuav tsum muab daim ntawv tshiab sau txog koj luam ib daim rau koj lossis qhia koj tias lawv nrhiav tsis pom dabtsi yuam kev. 

• Koj hais tau kom lub koomhaum xa daim ntawv sau txog koj tshiab mus rau tagnrho cov tswv tsev uas tau daim ntawv yuam kev 6 lub hli dhau los.

• Yog koj tsis pom zoo nrog qhov kev xwj, koj ntxiv tau daim ntawv “muaj lus cam” rau daim ntawv sau txog koj.  Lub koomhaum cia koj sau txog 100 lo lus.  Ntawm cov lus ntxiv, koj sau tias vim li cas koj tsis pom zoo li cov lus hais hauv daim ntawv sau txog koj.  Lub koomhaum yuav tsum xa cov lus no mus rau cov tswv tsev tshiab.  Yog koj hais, lawv yuav tsum xa mus rau cov tswv tsev uas tau koj daim ntawv 6 lub hli yav dhau los. months.

• Qhia qhov tseeb.  Yog koj muaj qhov raug ntiab tawm tsev, lossis lwm yam phem nyob hauv koj keebkwm, qhia rau tus tswv tsev.  Ua ntej koj them nyiaj ua ntawv xauj tsev, nug seb koj puas muaj feem tau lub tsev kem. 
   
• Hais koj tus tswv tsev tamsim no hais lus zoo txog koj rau tus tshiab.  Yog nws tsis kam hais lus zoo txog koj, hais kom koj tus nais ua haujlwm lossis lwm tus neeg paub koj sau ib daim ntawv hais lus zoo txog koj. 

Nco Cia: Daim ntawv no yog cov koomhaum siv heev los tshawb xyuas neeg xauj tsev hauv MN. Muaj coob ntxiv thiab. Zoo dua yog kom koj tus tswv tsev muaj lub koomhaum npe thiab xov tooj rau koj.