Ntiab Tawm Tsev Luam (PDF)473.18 KB
Ntiab Tawm Tsev Luam
Tus sau
Education for Justice
Read this in
Saib lossis luam cov ntawv tawm
Lwm Yam Kev Qhia Pab Tau (tsis txhais tag nrho)
Daim ntawv qhia no tham txog vim li cas thiaj li ntiab tau koj tawm tsev xauj rau cov peejxwm tau nyiaj tsawg, thiab yuav coj mus hais dua li cas.
Kuv nyob tsev xauj rau cov peejxeem tau nyiaj tsawg thiab tau daim ntawv ntiab tawm tsev. Kuv yuav ua li cas?
Daim ntawv qhia tseeb no yog rau cov neeg xauj tsev nyob tsev luam uas tau txais Daim Ntawv Qhia Xaus Ntawv Xauj Tsev. “Tsev Luam” txhais tias tsev xauj khiav lossis them rau los ntawm Public Housing Authority. Nws tau nyiaj pab los ntawm tsoom fwv cov khooskas tsev luam. Qhov no tsis yog tswv tsev ntiav lossis tsev Section 8.
Ntiab tawm hauv tsev luam ua raws li Xeev tsev hais plaub cov txheej txheem ntiab tawm tsev TABSIS lawv kuj muaj lawv ib co kauj ruam tshwj xeeb thiab. Nyeem daim ntawv tseeb no thiab peb daim ntawv qhia Ntiab Tawm Tsev.
Tej zaum tej yam nyob hauv daim ntawv no yuav tsis raug koj yog koj nyob tsev luam uas khiav los ntawm Minneapolis Public Housing Authority (MPHA) lossis St. Paul PHA. Coob cov Khooskas Tsev muab lawv cov tsev hloov los mus ua lwm cov khooskas pab nyiaj them tsev lawm.
Yog koj tau Daim Ntawv Xaus Ntawv Xauj Tsev, nws yog ib qhov zoo tswv yim yog hu koj lub hoobkas legal aid nrhiav kev pab sai li sai tau.
Ua Txhaum Daim Ntawv Xauj Tsev
Tej zaum lub “Housing Authority” Chaw Saib Xyuas Tsev yuav xaus koj daim ntawv xauj tsev rau tej teebmeem loj lossis tej yam pheej rov ua dua lossis tej yam teebmeem tsim nyog. Lub Chaw Saib Xyuas Tsev sau ntawv qhia koj tias koj ua txhaum daim ntawv xauj tsev qhov twg. Daim ntawv qhia yuav sau lub hlis thiab hnub tim lawv xav kom koj tawm.
Koj muaj cai hais saib xyuas cov ntawv lub Chaw Saib Xyuas Tsev muab txog xaus ntawv xauj tsev. Yog koj tsis tau ua li Chaw Saib Xyuas Tsev liam lossis yog koj tsis xav tias nws loj txaus muab ntiab tawm tsev, koj kom coj qhov muaj daim ntawv xauj tsev xaus rov los hais dua.
Koj yuav tsum sau ib daim ntawv mus rau Chaw Saib Xyuas Tsev thov coj rov los hais dua ua ntej lub sijhawm teem kawg hauv daim ntawv xauj tsev xaus. Qhov hnub kawg no feem ntau yog 10 hnub.
Feem ntau, nws muaj ob theem coj rov los hais dua. Thawj theem yog Rooj Sablaj “Informal Conference.” Yog kho qhov teebmeem daws tsis tau, koj hais kom coj mus hais Rooj Plaub loj “Formal Hearing.”
The qhov Chaw Saib Xyuas Tsev tsis muaj rov coj los hais dua rau tej yam teebmeem. Saib kem “Tshuam Kev Ruaj Ntseg thiab Ua Tej Yam Txhim Txhaum Kevcai” hauv qab no yuav qhia ntxiv.
Rooj Sablaj
- Koj coj tau ib tug neeg sawv cev rau koj lossis tus kws lij choj tuaj pab hais koj rooj plaub. Yog koj toobkas tus txhais lus rau rooj sablaj, qhia rau Chaw Saib Xyuas Tsev. Chaw Saib Xyuas Tsev yuav tsum them rau tus txhais lus.
- Yog koj tsis tau ua txhaum koj daim ntawv xauj tsev, nqa povthawj tuaj ntawm rooj sablaj. Povthawj yog tej yam xws li, ntaub ntawv, daim ntawv sau, lossis lus sau cia los ntawm cov neeg povthawj txhawb koj.
- Yog koj tau ua txhaum daim ntawv xauj tsev lawm, npaj txoj kev kom tseeb tias yuav ua cas qhov teebmeem thiaj yuav tsis tshwm sim ntxiv lawm. Qhov yog tej yam li cog lus tseg tias koj yuav tsis kam tus neeg ua teebmeem tuaj xyuas koj ntxiv lawm, lossis npaj siab nrhiav kev pab rau qhov teebmeem txhaum daim ntawv xauj tsev.
Yog ua txhaum daim ntawv xauj tsev vim muaj kev raug ua phem hauv tsev lossis yuam deev. Saib peb daim ntawv tseeb Cov Cai Pab Them Nqi Tsev rau Cov Neeg Raug Ua Phem Rau Hauv Tsev thiab Yuam Deev.
Yog ua txhaum ntawv xauj tsev vim muaj kev xiam oob qhab, saib peb daim ntawv tseeb Ua Kom Tsim Nyog Nyob Taus: Koj Puas Xav Kom Koj Tus Tswv Tsev Hloov Tej Yam Vim Koj Qhov Xiam Oob Qhab?
- Txawm yog koj tau ua txhaum ntawv xauj tsev los tsis tau, xyuam xim yam koj hais rau hauv Rooj Sablaj. Txhua yam koj hais rov coj los foob koj yav tom ntej hauv rooj plaub.
- Yog koj xav tias yuav swb xwb, ces kam tsiv tawm tsev, tiamsis nug qhov Chaw Saib Xyuas Tsev Xauj kom muab sijhawm li koj toobkas thiab sau ib qho lus tsis hais phem lossis hais tias koj yog ib tug neeg xauj tsev zoo. Qhov kev txiav txim siab tseem ceeb heev. Ua zoo xa ua ntej mam li kam tsiv tawm tsev. Thaum koj cog lus lawm, koj yuav tau ua li ntawd!
- Hais Chaw Saib Xyuas Tsev kom muab lus cog tseg sau cia. Yog daim ntawv cog lus TSIS hais txhuas yam li koj tau pom zoo, sau ntawv rau Chaw Saib Xyuas Tsev dua thiab hais kom lawv hloov cov khoom ntawm. Tsis txhob xee npe lossis pom zoo rau tej yam koj tsis xav ua lossis ua tsis tau.
- Txawm yog tias sib tham tsis haum, los lub Chaw Saib Xyuas Tsev yuav tsum sau ntawv qhia tias ua li cas thaum muaj rooj sablaj.
Yog koj sib tham tsis haum thaum muaj Rooj Sablaj, koj hais kom coj mus hais Rooj Plaub Loj. Lub sijhawm kawg rau qhov thov kom coj mus hais Rooj Plaub Loj muaj sau nyob hauv daim ntawv los ntawm Rooj Sablaj. Koj yuav tsum sau ntawv mus thov hais Rooj Plaub Loj!
Rooj Plaub Loj
Rooj Plaub Loj zoo li rooj plaub me hais muaj yeej muaj swb. Koj yuav tsum npaj koj rooj plaub tus kheej.
- Koj coj tau tus neeg sawv cev lossis tus kws lij choj. Hu koj lub hoobkas legal aid kom pab.
- Tej zaum tus mloog plaub lossis cov neeg mloog plaub yuav los mloog koj rooj plaub. Tej zaum cov neeg mloog plaub yuav yog lwm tus neeg xauj tsev luam thiab neeg ua haujlwm hauv tsev luam.
- Koj muaj cai tau tus txhais lus thaum hais plaub. Yog koj toobkas ib tug, qhia rau Chaw Saib Xyuas Tsev. Lub Chaw Saib Xyuas Tsev yuav tsum them rau tus txhais lus.
- Thaum hais plaub, koj thiab lub Chaw Saib Xyuas Tsev nyias qhia nyias zaj tias ua li cas. Koj muaj txoj cai kom lawv saib taus koj thaum hais plaub. Koj yuav tsum saib taus lawv thiab.
- Nqa khoom povthawj thiab coj cov timkhawv los qhia kom tau tias koj tsis tau ua txhaum koj daim ntawv xauj tsev. Nqa povthawj tias cov lus liam koj tsis yog li. Nqa povthawj qhia txog tej yam Chaw Saib Xyuas Tsev hais tsis ntxaws. Nqa khoom thiab coj cov timkhawv los pab qhia tias koj yog ib tug neeg xauj tsev zoo. Luam koj cov khoom povthawj tuaj qhia rau sawvdaws. Luam ib co rau koj khaws cia.
Nco Cia: Tej lub Chaw Saib Xyuas Tsev muaj cai txog povthawj rau lub Rooj Plaub Loj. Piv txwv, tej zaum koj yuav tau qhia pestsawg hnub ua ntej yam povthawj dabtsi thiab cov timkhawv koj muaj. Thiab lawv yuav tsum qhia rau koj tias lawv cov povthawj thiab cov timkhawv thiab. Nug Chaw Saib Xyuas Tsev txog cov kevcai hais plaub yog koj tsis tau lawv. Nyeem thiab ua raws li hais.
- Yog ua txhaum daim ntawv xauj tsev vim muaj kev raug ua phem hauv tsev lossis yuam deev, saib peb daim ntawv tseeb, Cov Cai Pab Them Nqi Tsev rau Cov Neeg Raug Ua Phem Rau Hauv Tsev thiab Yuam Deev.
Yog ua txhaum ntawv xauj tsev vim muaj kev xiam oob qhab, saib peb daim ntawv tseeb Ua Kom Tsim Nyog Nyob Taus: Koj Puas Xav Kom Koj Tus Tswv Tsev Hloov Tej Yam Vim Koj Qhov Xiam Oob Qhab?
- Yog muaj cov neeg hauv zej zog uas sawvdaws hwm lossis tej neeg nyob ze uas txhawb koj, hais kom lawv tuaj thaum hais plaub, tuaj hais lus zoo txog koj.
- Koj yuav tau ib daim ntawv sau tuaj qhia txog qhov lawv txiav txim ntawm koj Rooj Plaub Loj. Qhov txiav txim yuav qhia tias koj yeej los swb. Qhov txiav txim yuav tsum yog raws li povthawj ntawm rooj plaub thiab nws yuav qhia tias vim li cas thiaj txiav txim li ntawd.
Yuav zoo li cas yog kuv swb Roob Plaub Loj?
Yog koj swb Roob Plaub Loj, lub Chaw Saib Xyuas Tsev yuav xa daim ntawv qhia nrog hnub kawg koj yuav tsum tawm tsev. Yog koj tsis tawm thaum txog hnub ntawd, lub Chaw Saib Xyuas Tsev yuav ua tau ntawv ntiab koj tawm tsev hauv Xeev tsev hais plaub.
Koj nug tau tus kws txiav txim kom coj mus hais rooj plaub loj hauv xeev tsev hais plaub. Hu koj lub hoobkas legal sai li sai tau kom pab. Koj kuj nug tau Chaw Saib Xyuas Tsev kom muab sijhawm ntxiv rau koj tsiv tawm, thiab kom hais lus zoo txog koj, los pauv qhov koj tawm tsev thiab tsis mus foob hauv tsev hais plaub.
Yog raug ntiab tawm tsev, ces sawvdaws yuav pom cov ntaub ntawv. Kev ntiab tawm tsev muaj feem nyob hauv koj qhov keebkwm mus txog 7 xyoo. Ua zoo xav seb koj puas xav cam qhov ntiab tawm tsev lossis kam tsiv tawm. Qhov twg pom zoo nrog lub Chaw Saib Xyuas Tsev yuav tsum muab sau cia. Yog koj tau cog lus lawm, koj yuav tau ua li ntawd.
Pab Kom Tsim Nyog Nyob Taus
Yog koj lossis ib tug hauv tsev neeg muaj ib qho xiam oob qhab ces nws muaj lwm cov kev cai. Piv txwv: Lub Khooskas Tsev yuav xaus koj daim ntawv xauj tsev vim hais tias ua txhaum ib yam dabtsi nyob hauv daim ntawv xauj tsev lossis lwm txoj kev cai lawm. Yog tus neeg xiam oob qhab ua txhaum txoj kev cai, thiab vim yog qhov xiam oob qhab, koj muaj feem nug kom lawv ua tej yam kev pab tsim nyog kom nyob tau hauv koj lub tsev. Koj muaj feem thov kom lawv ua tej yam tsim nyog pab koj yog koj toobkas kom hloov daim ntawv xauj tsev vim qhov xiam oob qhab.
Saib peb daim ntawv tseeb Ua Kom Tsim Nyog Nyob Taus: Koj Puas Xav Kom Koj Tus Tswv Tsev Hloov Tej Yam Vim Koj Qhov Xiam Oob Qhab?
Tshuam Kev Ruaj Ntseg thiab Ua Tej Yam Txim Txhaum Kevcai
Yog koj, ib tug hauv koj tsev neeg lossis ib tug qhua siv yeeb tshuaj, ua lwm yam txim txhaum kevcai lossis tshuam kev ruaj ntseg rau lwm cov neeg xauj tsev lossis neeg ua haujlwm, lub Chaw Saib Xyuas Tsev tsis tas cia koj mus hais hauv Rooj Sablaj lossis Rooj Plaub Loj. Kom daim ntawv qhia ntiab tawm tsev yuav qhia koj hais tias lub Chaw Saib Xyuas Tsev hla qhov txheej txheem no. Yog lub Chaw Saib Xyuas Tsev hla cov kauj ruam no thiab koj tsis tsiv tawm tsev, lub Chaw Saib Xyuas Tsev yuav ua ntawv ntiab koj tawm tsev hauv xeev tsev hais plaub
- Yog koj raug ntiab tawm tsev vim siv yeeb tshuaj lossis lwm yam txim txhaum kevcai, tsis txhob nrog lwm tus tham txog qhov teebmeem no li. Tsis txhob kam cog lus leem txhaum txog siv yeeb tshuaj lossis txim txhaum kevcai nrog lub Chaw Saib Xyuas Tsev. Yog koj raug ntiab tawm tsev vim siv yeeb tshuaj lossis ua txim txhaum kevcai, koj yuav tsis tau tsev luam kom txog 3 xyoo lossis tshaj ntawd.
- Ntiab tsis tau koj tawm vim raug ntes ib zaug. Lub Chaw Saib Xyuas Tsev yuav tsum xwj thiab muaj povthawj qhia kom tau tias feem ntau yog vim koj ua qhov txhim txhaum kevcai es thiaj li raug ntes. Yog lub Chaw Saib Xyuas Tsev nrhiav tau povthawj qhia li no, ces xaus koj daim ntawv xauj tsev tau txawm yog tias tub ceebxwm tsis liam lub txim rau koj lossis tsev hais plaub tsis tau txiav txim koj txhaum.
- Yog koj xav tias Chaw Saib Xyuas Tsev yuam kev lawm, koj yuav tsum qhia tias vim li cas. Nqa povthawj mus hauv tsev hais plaub qhia tias lawv yuam kev lawm.
- Yog koj xav tias koj yuav swb hauv tsev hais plaub, tej zaum koj thov tau sijhawm ntxiv los tsiv tawm tsev. Yog koj cog lus tseg, koj YUAV TSUM ua raws li ntawd – ces ua zoo xyuas kom koj ua tau.
Cov Kevcai yog Koj Yog Tus Neeg Raug Ua Phem Rau
Lub Chaw Saib Xyuas Tsev ntiab tsis tau koj tawm tsev yog cov teebmeem no tshwm sim vim muaj kev ua phem hauv tsev, soj qab, hluas nkauj/raug ua phem, lossis yuam deev rau koj lossis ib tug hauv koj tsev neeg. Ntiab tsis tau koj tawm tsev vim hu tub ceevxwm. Hauv Minnesota, raug ua phem rau hauv tsev nrog txog kev hawv los ntawm menyuam, txheeb ze, lossis lwm cov neeg hauv tsev neeg.
Qhia lub Chaw Saib Xyuas Tsev yog koj xav tias xaus ntawv xauj tsev yog vim ib qho ntawm cov no. Saib peb daim ntawv tseeb, Cov Cai Pab Them Nqi Tsev rau Cov Neeg Raug Ua Phem Rau Hauv Tsev thiab Yuam Deev.
Lub Chaw Saib Xyuas Tsev nug tau kom koj muab povthawj txog qhov raug ua phem hauv tsev lossis yuam deev tsis pub dhau 14 hnub. Lawv yuav tsum sau ntawv nug koj. Tej zaum tau tsev hais plaub daim ntawv tiv thaiv yog ib txoj kev qhia tau qhov raug ua phem hauv tsev. Tabsis lub Chaw Saib Xyuas Tsev yuam tsis tau kom mus ua daim ntawv tim tsev hais plaub. Nws kuj muaj lwm txoj kev qhia tau thiab. Nrhiav kev pab ntawm legal aid lossis ib tug pab sawv cev txog raug ua phem hauv tsev lossis yuam deev yog koj toobkas muaj povthawj pab rau koj rooj plaub.
Tsis Them Nqi Tsev
- Yog koj tsis them koj qhov nqi tsev raws sijhawm, lub Chaw Saib Xyuas Tsev yuav xav ntawv qhia kom koj yusv tsum them tsis pub dhau 30 hnub lossis tsiv tawm.
- Yog koj tsis muaj nyiaj, hu rau lub Chaw Saib Xyuas Tsev sai li sai tau seb lawv puas kam koj ua ib zaug them mentsis. Sau cia seb koj nrog leejtwg tham thiab lawv kom koj ua dabtsi. Ntxiv ntawd, nrog lub nroog hoobkas pab nyiaj tsoom fwv tham txog tau Kev Pab Xwm Ceev “Emergency Assistance.”
- Yog koj tsis tiv nqi tsev, nrog lub Chaw Saib Xyuas Tsev tham tias ua cas lawv ho xav tias koj tiv nqi. Sau cia seb koj nrog leejtwg tham thiab lawv qhia kom koj ua dabtsi. Yog koj tseem tsis pom zoo, hu rau koj tus tswj kav tsev thiab thov muaj qhov Rooj Sablaj. Sau ib daim ntawv es koj thiaj paub tias koj thov dabtsi. Nco ntsoov tias hais kom muab daim ntawv them nqi rau koj txhau zaus tom ntej no mus es thiaj tsis muaj kev tsis sib totaub lawm.
- Koj muaj cai mus hais Rooj Sablaj nrog tus tswj kav tsev. Yog qhov ntawd kho tsis tau qhov teebmeem, koj nug tau kom hais Rooj Plaub Loj.
- Yog koj tsis them nqi tsev vim tsis kho tsev, hais kom muaj qhov Rooj Sablaj lossis hais Rooj Plaub Loj los tham txog tej yam yuav tsum kho. Saib peb daim ntawv tseeb Kom Tus Tswv Tsev Kho Vajtse.
- Yog koj xav tias koj tus nqi tsev lossis nyiaj tau los laij tau tsis yog lawm, nqa tagnrho koj cov ntawv koj muaj coj mus rau tus tswj kav tsev saib.
- Yog koj pom zoo them rov qab rau lub Chaw Saib Xyuas Tsev, yuav tsum muab qhov cog lus sau cia.
Nco Cia: Tus nqi koj cog lus them rov qab txhua hli muaj qhov txiav los ntawm HUD cov kevcai. Koj tus nqi tsev ntxiv qhov nyiaj them rov qab yuav tsum tsis txhob ntau tshaj 40% ntawm koj qhov nyiaj tau los txhua hli. Yog koj muaj teebmeem, tiv tauj koj lub hoobkas legal aid.
Yog koj tsis them qhov nqi tsev lossis sib hais kom muaj kev sib pom zoo li ntawm 30 hnub, lub Khooskas Tsev muaj cai foob ntiab koj tawm tsev. Koj yuav txais ntawv hais plaub qhia koj tias mus hais plaub thaum twg. Npaj tos cov ntawv no.
Koj muaj cai raws li Minnesota kevcai los them cov nqi tsev hauv tsev hais plaub, ntxiv nqi hais plaub ces tau nyob koj lub tsev.
Them Qhov Tsawg Kawg rau Nqi Tsev
Coob lub Chaw Saib Xyuas Tsev muaj qhov “them tsawg kawg” uas cov neeg xauj tsev yuav tsum them txawm yog lawv tau nyiaj tsawg heev. Yog koj them tsis tau qhov nqi tsawg kawg, tej zaum koj muaj feem tau qhov “zam txim tsis tau them vim txom nyem” ib ntus lossis tas mus li. Nug tus tswj kav tsev txog qhov kev zam no sai li sai tau. Sau cia seb koj nrog leejtwg tham thiab lawv kom koj ua dabtsi.
Koj muaj feem tau qhov kev zam yog tias koj them tsis taus vim:
- koj poob haujlwm
- koj tseem tos tsoom fwv cov kev pab, lossis koj poob tsoom fwv cov kev pab lawm (tabsis tsis yog koj ua txhaum cov cai)
- muaj ib tug hauv tsev neeg nyuam qhuav tas sim neej lawm lossis
- koj yuav raug ntiab tawm xwb yog tias lub Chaw Saib Xyuas Tsev pheej yuav kom them nqi tsev, lossis koj muaj lwm qhov teebmeem txog nyiaj txiag.
Qhov kev zam tsis tau them vim muaj kev txom nyem pib lub hlis tom qab koj thov nws. Yog tau qhov kev zam rau ib ntus xwb (mus txog 90 hnub lossis luv dua), lub Chaw Saib Xyuas Tsev yuav tsis tau ntiab koj tawm tsev tabsis teem qhov nqi tsev tsawg kawg rau koj thiab hais kom koj them lwm lub sijhawm yav tom ntej. Koj nug tau txog qhov them rov qab thiab them qhov nqi tsev mentsis zuj zus.
Yog qhov koj them tsis tau yog tas mus li (ntev tshaj 90 hnub), ces koj yuav tsum tau kev zam kom txog thaum koj qhov kev nyiaj txiag hloov. Yog lub Chaw Saib Xyuas Tsev tsis kam ua tej no, lossis koj twb raug ntiab tawm lawm, hu rau koj lub hoobkas legal aid kom pab.
Haujlwm nyiaj tau los thiab nqi xauj tsev
Thaum koj nyob hauv tsev luam, koj tus nqi tsev yog teem 30% ntawm koj qhov nyiaj suav tau los. Tej zaum txoj kevcai no txawv yog koj nyob hauv tsev luam khiav los ntawm Minneapolis Public Housing Authority.
Nws muaj tej qho tseem ceeb zam tau rau txoj cai no. Qee zaum kev hloov nyiaj tau los hauv tsev neeg vim txoj haujlwm tsis hloov tus nqi tsev tamsim ntawd. Tej yam no hu uas tsis suav nyiaj tau los (earned income disallowances). Ib co ntawm yog:
- Nyiaj koj tau los ntawm txoj haujlwm koj tau 6 hlis tom qab tau MFIP.
- Yog koj tsis ua haujlwm lossis ua haujlwm tsis txaus tau ib xyoo ua ntej koj tau ib txog haujlwm. Ua haujlwm tsis txaus txhais tias koj ua tau nyiaj li qhov teem tsawg kawg lossis tsawg tshaj ntawv tsis dhaus 500 teev ua haujlwm xyoo tas los no. Xyoo tas los no yog $5,000.
- Koj tseem nyob hauv ib qho khookas kawm haujlwm.
Qhia rau lub Chaw Saib Xyuas Tsev lossis tus kws txiav txim yog tias tej qhov no raug koj. Qhov tsis suav yog hais rau 24 hlis tom qab koj ua haujlwm lawm. Cov kevcai txog tsis suav nyiaj tau los nyuaj, thiab txoj kevcai rau qhov no yuav hloov sai. Yog koj muaj teebmeem lossis lus nug, hu koj lub hoobkas legal aid.
Nyiaj Tsoom Fwv thiab Nqi Tsev
Lub Chaw Saib Xyuas Tsev yuav tsum txo koj tus nqi tsev yog koj poob nyiaj tsoom fwv vim koj siv tas koj qhov 60 hli MFIP lawm. Tabsis lawv yuav tsis txo koj tus nqi tsev yog koj poob nyiaj tsoom fwv vim dag lossis ua txhaum nyiaj tsoom fwv cov kevcai (raug nplua). Tej zaum lub Chaw Saib Xyuas Tsev yeej txhaum txog tej yam lawv npluas. Txhua yam kev nplua tsis suav rau qhov no. Hu koj lub hoobkas legal aid yog koj muaj qhov teebmeem no.
Ua Kom Tsis Txhob Raug Ntiab Tawm Tsev
Yeej zoo dua yog tsis raug ntiab tawm tsev. Raug ntiab tawm tsev yog ntaub ntawv sawvdaws pom tau ces cov tswv tsev kuaj tau. Nws yuav ua rau koj nrhiav tsev tshiab nyuaj dua. Ces yog koj xav tias koj yuav swb hauv tsev hais plaub, tsiv tawm ua ntej Chaw Saib Xyuas Tsev ua ntawv ntiab koj tawm tsev. Qhia rau Chaw Saib Xyuas Tsev tias koj yuav tsiv tawm kom lawv tsis txhob ua ntawv ntiab koj tawm tsev ua ntej lossis tom qab koj tawm. Saib peb daim ntawv tseeb Ntiab Tawm Tsev thiab Tshem Tawm Rooj Plaub Raug Ntiab Tawm Tsev.