Txwv Tsis Pub Nyob

Daim ntawv qhia tseeb no yog rau cov neeg xauj tsev rau lub tsev txheej “apartment” lossis tsev xauj tau raug lo ntawv tias txwv tsis pub nyob vim muaj teebmeem yuav tau kho, tsis muaj fais fab lossis dej siv lossis lwm yam uas phomsij rau kev noj qab haus huv. Nyob rau tej lub xeev, tej yam muaj ntxiv uas raug lo ntawv txwv yog tias tus tswv tsev tsis muaj ntaub ntawv xauj tsev rau lwm tus. Tej thaum cov ntawv kuj yuav hais tias, "Yuav Raug Txwv Tsis Pub Nyob" lossis "Tsis Txhob Nyob."

Daim ntawv txwv muaj lub sijhawm uas yuav tau tawm (tsiv-tsev) sau ua hnub tim. Yog kev txwv tsis raug cheem, koj yuavtsum tau tsiv tawm ua ntej hnub tim ntawd, lossis cov tub ceevxwm yuav tshem tau koj tawm. Koj muaj feem hu tau lub nroog tus neeg kuaj vaj tse kom muab sijhawm ntxiv rau koj, tiamsis lawv tsis tas yuavtsum muab rau koj.

Hu rau koj lub hoobkas kevcai lij choj legal aid tamsim ntawd ntawm (877) 696-6529. Nyob rau tej lub nroog koj muaj cai tsis pom zoo rov qab sib hais dua txog tus kuaj tsev ntawd txoj kev txwv tsis pub nyob. Koj kuj muaj feem ua ntaub ntawv Xwmtxheej Ceev Ntawm Tibneeg Xauj Tsev Txoj Kev Txhim Kho (ETRA) kom tus tswv tsev kho lub tsev thiab cheem kev txwv, lossis kom tau nyiaj pab them nqi xauj ib chav pw “motel” lossis them nqi tsiv tsev.

Mus saib peb daim ntawv qhia tseeb Teeb Meem Xwm Ceev Kho Kom Sai. 

Yog koj muaj ntaub ntawv xauj tsev, nws xaus tamsim vim kev raug txwv tsis pub nyob. Qhov no txhais tias koj tsis tiv nqi xauj tsev rau koj tus tswv tsev rau cov hli tom qab lub nroog yuam koj tsiv tawm.

Tejzaum kuj muaj cov chaw kev pabcuam nyob rau koj cheebtsam uas pab tau koj tsiv tawm, nrhiav chaw nkaum, lossis nrhiav ib qhov chaw nyob tshiab.  Hu rau 2-1-1 uas nyob thoob lub xeev. Nws yog ib lub chaw pabcuam uas muaj ntaub ntawv qhia cov chaw uas pab tau koj. Koj kuj muaj feem ntaus ntawv hauv xovtooj xa koj tus zauv cheebtsam koj nyob mus rau 8898-211 kom nrhiav tau kev pab nyob koj cheebtsam lossis mus tham hauv lub vassab ntawm www.211unitedway.org.                                                                                                       

Yog koj tsis muaj nyiaj tsiv tsev thiab them rau ib qhov chaw tshiab, koj muaj feem txais kev pabcuam los ntawm Emergency Assistance (EA). Los yog mus online rau https://mnbenefits.mn.gov/. Hu mus rau koj nroog lub “Economic Assistance Department,” qhov chaw Pab Nyiaj Txiag.

Koj tus tswv tsev yuavtsum tau rov koj qhov nyiaj cas tsev tsis pub dhau 5 hnub ntawm hnub tim uas koj tsiv tawm vim raug txwv tsis pub nyob.

Xa ib tsab ntawv mus rau tus tswv tsev qhia koj qhov chaw nyob uas tus tswv tsev yuav tau xa qhov nyiaj cas tsev rov tuaj rau koj. Sau hnub tim rau daim ntawv thiab khaws ib daim cia rau koj tus kheej. Mus saib peb daim ntawv qhia tseeb Nyiaj Cas Tsev.

Koj muaj feem foob koj tus tswv tsev tom qab koj tsiv tawm lawm.  Mus saib peb daim ntawv qhia tseeb Chav Hais Plaub Pej Xeem Sib Foob. Nws yog ib lub tswvyim zoo ua tej yam xws li:

• Khaws cia tej ntaub ntawv uas yuav siv hauv tsev hais plaub xws li tw tshev them nqi xauj tsev, ntaub ntawv xauj tsev, thiab cov ntawv uas sau mus rau tus tswv tsev.
   
• Mus muab kom tau ib daim ntawv kuaj tsev thiab ntaub ntawv txwv los ntawm lub nroog los.
   
• Yog koj ua tau, thaij duab txog tej yam teebmeem uas yuav tau kho hauv lub tsev ua ntej koj tsiv tawm.  Sau txhua yam teebmeem uas yuavtsum tau kho thiab seb pib thaum twg los lawm.
   
• Nrhiav neeg mus nrog koj ua timkhawv mus saib chav tsev kem nrog koj.
   
• Khawv cov ntawv them nyiaj tom koj tsiv tawm: xauj chav pw, xauj tsheb tsiv tsev, sam roj, zaub mov thiab chaw xauj tso khoom cia rau hauv.
   

Yog koj chav tsev kem twb rau txwv tsis pub nyob thaum koj tsiv los nyob lawm, koj muaj feem foob koj tus tswv tsev thiab tau txais 3 npaug qhov nyiaj xauj tsev thiab nyiaj cas tsev uas koj tau them lawm.  Hu mus rau koj lub nroog tus neeg kuaj tsev kom paub tseeb tau tias seb lub nroog twb txwv koj chav tsev kem thaum twg los lawm.

Ua ntaub ntawv rau koj rooj plaub foob sai li sai tau. Mus tim tsev hais plaub thiab qhia tias koj yuav ua ntaub ntawv tsis txaus siab rau hauv Conciliation Court, chav tsev hais plaub neeg sib foob neeg. Koj muaj feem foob mus txog $20,000 nyob rau hauv Conciliation Court, thiab koj tsis tas yuav muaj ib tus kws lijchoj.

Koj muaj feem foob txog ntau tshaj $20,000 nyob rau hauv “District Court” Tsev Hais Plaub Hauv Lub Xeev tiamsis tejzaum koj yuav xav nrhiav kws lijchoj pab.

Yog cov teebmeem yuavtsum kho hauv lub tsev ntawd ua raug mob lossis muaj kabmob, lossis yog tias cov xim thas tsev muaj hlau, tham nrog ib tug kws lijchoj hais plaub txog kev raug mob ua ntej koj mus ua ntaub ntawv foob nqi them tsev xauj.

Koj yuavtsum tau koj tus tswv tsev lub npe thiab chaw nyob. Koj mus muab tau los ntawm lub nroog cov ntaub ntawv kuaj tsev lossis chav lis dejnum se vajtse. Yuav muaj nqi them ua ntaub ntawv mentsis, tiamsis koj tsis tas them yog tias koj yog neeg ua haujlwm tau nyiaj tsawg.

Koj muaj feem foob rau:

• Koj cov nyiam cas tsev: Yog koj tus tswv tsev tsis tau xa qhov nyiaj cas tsev, lossis ib tsab ntawm qhia tias vim licas, tuaj rau koj ua ntej dhau 5 hnub ntawm hnub koj tsiv tawm, koj muaj feem tau txais ob npaug qhov nyiaj cas tsev.  Koj muaj feem foob $500 tshaj vim tswv tsev "tsis ua raws cog lus."
   
• Koj cov nyiaj xauj tsev: Koj muaj feem foob kom tau ib feem lossis tagnrho koj cov nyiaj xauj tsev rov qab rau txhua lub hlias uas tswv tsev yeej paub txog cov teebmeem yuavtsum kho hauv lub tsev tiamsis tsis kho.  Thaum ib chav tsev kem twg muaj teebmeem ntau txaus raug txwv, koj muaj feem hais kom tsis tau them tus nqi xauj tsev li. Qhov no txhais tau tias koj yuavtsum tau tagnrho koj cov nyiaj xauj tsev rov qab uas koj tau them rau txhua lub hlias uas lub chav tsev kem ntawd rau txwv.
   
• Nqi Tsiv Tsev: Foob kom tau tagnrho cov nyiaj uas koj tau siv tshaj vim txoj kev txwv ntawd.  Koj yuav tau nco ntsoov khaws cov ntawv them txhua yam cia los ua povthawj. Tiamsis txawm koj khaws tsis tau cov ntawv them los, koj muaj feem nug tus kws txiav.

Nov yog ib qhov pivtxwv tsis txaus siab rau Conciliation Court.

Kuv tau xauj chav tsev kem ntawm 71 Smith St., #3, Minneapolis, MN 555405 los ntawm John Landlord them $700 tauj ib hlis. Kuv tsiv mus nyob hauv rau Lub 1 Hlis Tim 1, Xyoo 2013. Nws twb yeej raug txwv thaum Lub 6 Hli Tim 15 vim tsis muaj dej kub thiab muaj lwm yam teebmeem yuav tau kho. Lub taub dej kub tsis ua haujlwm rau Lub 3 Hlis Tim 2. Lwm cov teebmeem twb yeej muaj nyob ua ntej thaum kuv tsev los nyob lawm.

Tswv Tsev tsis tau muab kuv qhov nyiaj cas tsev rov rau kuv lossis sau ntawv qhia kuv ua ntej dhau 5 hnub.

Kuv foob rau cov nyiaj xws li muaj no: