Kev Sib Yuav Hauv Minnesota

Yog kom sib yuav tau raws txoj cai nyob Minnesota ces koj yuavtsum tau mus ua ntaub ntawv rau daim ntawv sib yuav thiab tau kev sib txis los ntawm ib tug kws muaj cai txis tau neeg sib yuav. Tom qab ntawd ces koj yuav tau daim ntawv tso cai sib yuav uas qhia tau tias koj sib yuav raws cai lawm.

Txij thaum 2015 los, kev pojniam yuav pojniam thiab txiv neej yuav txiv neej yeej muaj cai rau hauv Tebchaws United States lawm.

Puas yog koj sib yuav lawm lossis yog neeg tsis muaj ntaub ntawv nyob tebchaws? Tejzaum koj yuavtsum tau paub tej yam ntxiv. Mus saib peb daim ntawv tseeb Neeg Tuaj Lwm Teb chaws Tuaj, Kev Sib Yuav thiab Sib Nrauj hauv lub Xeev Minnesota thiab Cov neeg Tuaj Nyob Teb Chaws No es Tsis Muaj Ntaub Ntawv Nyob Puas Sib Yuav Tau Hauv Lub Xeev Minnesota?

• Koj yuav tsum muaj hnub nyoog tshaj 18 xyoo thiab txiav txim siab tau koj tus kheej hais tias koj sib yuav tau raws li txoj cai hauv Minnesota.

• Minnesota tsis suav cov neeg tsis tau muaj hnub nyoog 18 xyoo uas tawm mus sib yuav hauv lwm lub xeev.

• Yog koj xav sib yuav mas koj yuavtsum tsis txhob twb muaj txwj nkawm lawm. 

• Yog koj twb sib yuav dhau los lawm, koj yuavtsum tau ntaub ntawv sib nrauj raws cai los ntawm koj tus qub txwj nkawm. Daim ntawv sib nrauj raws cai yog ib daim uas mus raws cov cai sib nrauj nyob hauv lub xeev lossis lub tebchaws uas rooj sib nrauj ntawd tshwmsim. Hauv Minnesota, kev sib nraug yuavtsum mus rau tsev hais plaub thiab yuavtsum muaj ntaub ntawv xee npe los ntawm kws hais plaub ua ntej rooj sib nrauj ntawd tiav tau.

Minnesota tsis tso cai rau tej co txheeb ze rov sib yuav. Koj yuav tsis tau:

• Koj tus menyuam uas koj yug lossis yuav los tu.
• Koj tus xeebntxwv ntawm koj cov menyuam yug lossis xeebntxwv ntawm cov menyuam yuav los tu. 
• Koj cov ntxhais ntwg lossis tub ntwg uas muaj koj roj ntsha.
• Koj tus nusmuag npaws. Cov nusmuag npaws yog cov menyuam ntawm tej phauj lossis niam tias lossis tej txiv hlob txiv ntxawm thiab dablaug uas koj txheeb raws roj ntsha.

Yuav sib yuav hauv Minnesota, koj mus ua ntaub ntawv tso cai sib yuav. Koj muaj feem mus ua ntaub ntawv nyob rau txhua nroog. Koj tsis tas yuav ua ntaub ntawv nyob rau ntawm lub nroog uas koj xav siv yuav ntawd. Vim txhua lub nroog sib txawv, tiv tauj koj lub chaw ua ntaub ntawv tso cai sib yuav txog tias yuav mus ua daim ntawv sib yuav tso cai qhovtwg. Mus saib seb nyob koj lub nroog puas muaj tus xovtooj qhia lus lossis mus saib hauv vassab txog koj lub nroog thiab nrhiav lub chaw ua ntawv tso cai“license center”.

Ntau lub nroog muaj cov ntaub ntawv uas koj luam tau tawm hauv lawv lub vassab. Tej lub kuj cia koj pib ua ntaub ntawv hauv online thiab. Mus saib koj lub nroog lub vassab.

Koj yuavtsum tau mus uake rau lub chaw ua ntaub ntawv tso cai mus ua daim ntawv sib yuav. Yog tias muaj tej yam dabtsi ua rau koj mus tsis tau uake, nug lub chaw ua ntaub ntawv tso cai tias seb koj yuavtsum tau ua dabtsi thiaj li ua tau daim ntawv tso cai sib yuav. 

Tus nqi ua daim ntawv sib yuav yog $115. Yog tias koj mus kawm 12 teev ntawm chav kawm txwj nkawm ua ntej sib yuav, tus nqi txo los ua $40. Koj yuav tau mus kawm chav ntawd los ntawm:

• ib tug txiv plig uas muaj ntaub ntawv lossis tau cai ua txiv plig
• ib tug neeg uas muaj cai txis pejxeem ua txwj nkawm, lossis
• ib tug neeg uas muaj cai txhim kho txog kev txwj nkawm thiab kho tsev neeg

Tham nrog koj tus txiv plig lossis mus saib hauv vassab kom paub cov neeg ua haujlwm txog kev ntuas ua ntej sib yuav. Nco ntsoov nug sev tus nqi yog licas ua ntej koj cuv npe rau.

Koj yuavtsum muaj phuav pheej qhia tias koj yeej tau kawm tas lawm. Tus neeg uas qhia cov chav ntawd yeej muaj cov ntaub ntawv lossis lus sau rau tsab ntawv qhia tias koj tau kawm lawm. Daim ntawv lossis tsab ntawv yuavtsum tau kws ntaus thwj rau. Nqa nrog koj thaum mus ua koj daim ntaub ntawv tso cai.

Yog neb ib tug xav hloob neb ib qhov lossis tag nrho lub npe, koj ua tau qhov ntawd hauv koj daim ntawv tso cai sib yuav.  Yog koj txiav txim hloov npe tom qab koj sib yuav lawm, koj yuav tau mus ua rau hauv tsev hais plaub.  

Yog koj muaj ib kub txim txhaum teem loj hu uas “felony” rau ib lub xeev twg thiab koj xav hloov koj lub npe thaum koj sib yuav, muaj ib daim ntawv ntxiv koj yuav tsum tau sau ua ntej koj yuav tau koj daim ntawv tso cai sib yuav. Mus kuaj nrog tus kws lij choj nyob hauv koj lub nrrog txoj qhov txheej txheem thiab yuav muaj daim ntawv no li cas. Tus kws lij choj hauv lub nroog muaj 30 hnub los mus tawm tsam qhov koj yuav hloov npe. Yog li, nco tsoom koj yuav tsum ua qhov no 30 hnub ua ntej koj npaj nqa koj daim ntawv tso cai sib yuav mus rau hauv nroog.  

Tamsim no tsis muaj sijhawm tos koj daim ntawv tso cai sib yuav lawm. Feem ntau, koj teem sijhawm mus rau tom lub hoob kas ua daim ntawv tso cai sib yuav thiab koj yuav tau koj daim ntawv sib yuav tso cai thaum koj mus ntsib lawm.

Koj daim ntawv sib yuav siv tau txog 6 lub hlis ntawm hnub tim uas sau rau lawm. Yog koj tsis sib yuav ua ntej 6 lub hlis, koj yuav tau rov qab ua dua ntaub ntawv.

Yog koj tsis tau sib yuav ua ntej 6 lub hlis vim kev muaj mob lossis lwm yam teebmeem loj, koj muaj feem tsis tas rov them tus nqi dua. Nug koj lub nroog.

Tom qab koj tau daim ntawv tso cai sib yuav lawm, cov neeg nram no uas muaj tshaj 21 xyoos muab koj sib yuav tau THIAB yog ib tug:

• Kws txiav txim, nrog rau cov kws txiav txim uas so haujlwm lawm
• Kws khiav ntaub ntawv haus tsev hais plaub, nrog rau cov khiav ntaub ntawv uas so haujlwm lawm yog tias tus thawj kws txiav txim ntawm nws lub xeev tau tso cai
• Ib tug qub kws leg dejnum rau tsev hais plaub uas ua haujlwm rau tsev hais plaub lossis ua haujlwm sawv cev raws kev tswj los ntawm thawj kws txiav txim ntawm tus kws leg dejnum ntawd lub xeev chaw hais plaub
• Tus thawj tswj kev kawm rau lub chaw Minnesota State Academy for the Deaf thiab lub chaw Minnesota State Academy rau cov neeg digmuag
• Tus txiv plig uas muaj ntaub ntawv lossis tau cai ua txiv plig nyob hom pawg ntseeg twg los tau

Yog koj xav tau kev sib yuav los ntawm ib tug kws ua haujlwm rau tsev hais plaub, tiv tauj koj lub nroog ntawm qhov koj xav sib yuav kom tau ntaub ntawv qhia txog. Koj muaj feem mus nrhiav tau ntaub ntawv tiv tauj rau txhua lub nroog cov tsev hais plaub nyob ntawm www.mncourts.gov (lus Askiv xwb). Nias qhov “Find Courts” thiab xaiv koj lub nroog.

Yog koj ua ntaub ntawv tso cai sib yuav hauv Minnesota, koj lub koobtsheej sib yuav yuavtsum nyob rau hauv lub xeev Minnesota.

Dua li ntawm qhov yuavtsum muaj ib tug neeg muaj cai muab neeg sib yuav los txis txwj nkawm, koj yuavtsum muaj 2 tug neeg uas timkhawv nyob rau lub koobtsheej. Cov neeg ua timkhawv yuavtsum muaj tshaj 16 xyoo. Lawv xee npe rau koj daim ntawv sib yuav ua povthawj tias lawv yeej nyob ntawd pom.

Yog koj lub koobtsheej muaj kev coj los ntawm cov txiv plig, lub koobtsheej yuavtsum ua raws koj kab lis kev cai.

Yog lub koobtsheej muaj kev coj los ntawm kws txiav txim, kwv ua haujlwm rau tsev hais plaub, lossis lwm tus neeg us tsis yog raws kev ntseeg, koj yuav tau hais cov lus tawm tias koj yeej txais tus khub ntawd los ua koj tus txiv, pojniam, lossis txwj nkawm thaum nyob rau lub koobtsheej.

Tom qab koj lub koobtsheej, tus neeg uas coj koj lub koobtsheej ntawd muaj 5 hnub xa daim ntawv mus rau lub nroog uas koj ua ntaub ntawv tso cai sib yuav. Lub nroog ntawd yuav ceev cia koj kev sib yuav thiab yuav xa ib daim ntawv sib yuav ntaus lub thwj raws cai tuaj rau koj.

Yog koj tau hloov koj lub npe, koj yuav tau hloov cov ntaub ntawv uas muaj koj npe nyob rau. Qhov no muaj xws li ua ntaub ntawv rau ib daim pib social security tshiab, qhia rau koj lub tuam

txhab ceev nyiaj, rau cahw ua haujlwm, thiab mus ua daim ntawv tsav tsheb tshiab lossis ID rau lub xeev. Koj yuav tau tivtauj txhua lub chaw haujlwm ntawd mus nug seb yuav ua licas.