Koj Txoj Haujlwm: Kuaj Keebkwm, Kuaj Mob thiab Yeeb Tshuaj thiab Lwm Yam

Lub chaw haujlwm muaj cai hais kom koj muab cov npe ntawm cov neeg uas paub koj – cov neeg uas koj tau ua haujlwm rau lossis cov paub koj zoo.

Chaw haujlwm mus muab ntaub ntawv tau txog koj kev siv nyiaj txiag los ntawm ib lub chaw teev ntaub ntawv txog nyiaj txiag.  Lawv yuav tsum tau qhia rau koj paub ua ntej lawv yuav ua li ntawd THIAB yuavtsum tau koj sau ntawv tso cai ua ntej. Lawv yua vtsum qhia koj yog tias muaj dabtsi nyob rau cov ntaub ntawv kev siv nyiaj txiag uas yuav raug siv los tib kev ntiav koj ua haujlwm. Lawv yuav tsum tau muab ib daim rau koj thiab muab ntaub ntawv qhia txog koj txoj cai uas koj muaj.

Koj muaj cai mus kho lossis sib cav txog cov ntaub ntawv nyob rau daim ntawv qhia. Mus saib peb daim ntawv, Daim Ntawv Keeb Kwm Tiv Nqi.

Cov chaw haujlwm kuaj tau txog keebkwm txhaum cai.  Lawv tsis tas yuav tau koj kev tso cai yog tias lawv tus kheej yog tus mus muab koj cov ntaub ntawv uas yeej muaj teev rau cheeb tsam nroog uas koj nyob, tiamsis lawv yuav tsum tau koj kev tso cai yog tias lawv ntiav lwm lub lag luam uas tshawb fawb neeg keebkwm los nrhiav.  Koj kuj yuav tsum tau muab kev tso cai ua ntej yog tias lawv xav tshawb nrog FBI lossis lub xeev koomhaum BCA.  Yog koj tsis kam, lawv muaj feem yuav tsis kam ntiav koj ua haujlwm.

Txoj cai hais tias lub chaw haujlwm ntug tsis tau koj txog koj tej keebkwm kev ua txhaum cai lossis mus tshawb koj keebkwm ua txhaum cai kom txog rau thaum lawv caw koj xamphaj haujlwm lossis lawv kam cia koj ua haujlwm tos ntaub ntawv. Thawj daim ntawv xamphaj haujlwm tsis yuav tsum tsis txhob muab lub thawv nug seb koj puas muaj keebkwm tau ua txhaum cai.  

Cov chaw haujlwm yuavtsum tau kuaj keebkwm kev ua txhaum cai rau tej haujlwm xws li cov neeg ua haujlwm rau fab kev noj qab haus huv, rau tseemfwv cov tsev kawm ntawv thiab rau cov haujlwm saib xyuas cov tsev loj xauj nyob. Lawv tsuas siv tau cov keebkwm txhaum cai yog tias yuav tsum muaj ib qho haujlwm cuam tshuam txog qhov no. Lub chaw haujlwm yuam tsis tau kom koj them rau kev kuaj cov ntaub ntawv keebkwm no.

Qhov tseeb txog koj qhov keebkwm kev ua txhaum cai.  Nws yuav phem tshaj yog tias koj dag txog kev tau ua txhaum cai dua li qhov koj cia li qhia qhov tseeb ua ntej thiab piav tias koj hloov koj lub neej li cas kom txawv qhov qub lawm. Yog koj tsis qhia qhov tseeb txog koj keebkwm ua txhaum cai, thiab koj raug rho tawm haujlwm, tej zaum koj yuav tsis tau txais nyiaj poob haujlwm.

Neeg Ua Haujlwm Rau Pejxeem. Qhov no txhais tias lub nroog, lub xeev, thiab lub cheeb tsam tej koomhaum rau tseemfwv thiab chaw haujlwm. Xeev Minnesota Txoj Cai hais tias kev tau ua txhaum cai yuav tsum tsis txhob txwv tau koj txoj kev tau haujlwm lossis kev ua tau daim ntawv tso cai tshwj tias qhov tau ua txhaum ntawd cuam tshuam ncaj nraim rau hom haujlwm ntawd.  Txawm li ntawd los, koj yuav tsum tsis txhob raug rho tawm ntawm kev ntiav ua haujlwm yog koj yeej qhia tau tias koj ua tau txoj haujlwm thiab twb “rov hloov zoo lawm.” Txoj kev rov hloov zoo lawm yog txhais tau tias koj twb hloov thiab tsis muaj feem yuav ua dua txoj kev txhaum cai ntawd ntxiv lawm.

Cov chaw haujlwm rau pejxeem siv tsis tau tej ntaub ntawv txog kev raug ntes, ntaub ntawv uas twb muab tshem tawm lawm lossis lwv tawm thiab tej kev tau ua txhaum me los ntaus nqi rau thaum koj ua ntawv rau ib txoj haujlwm pejxeem lossis ua daim ntawv tso cai, xws li daim ntawv tso cai txiav plaub hau.

Lub chaw haujlwm siv tau kev kuaj tus xeeb ceem lossis txoj kev xav coj los ntsuas cov neeg uas tuaj xamphaj, tiam sis tsuas yog tom qab kom mus haujlwm. Lawv siv tsis tau kev xeem uas ntsuas seb puas dag lossis ntsuas yus keeb ntshav neeg.  

• Kev Kuaj Yeeb Tshuaj thiab Dej Caw

          Yog lub chaw haujlwm xav kom koj mus kuaj yeeb tshuaj lossis dej caw ces lawv yuav tsum sau ua ntaub ntawv qhia koj.  Lawv tsuas kuaj tau tom qab lawv muab txoj haujlwm rau koj lawm xwb.  Txhua tus neeg uas lawv hais rau tias tsuas tau txoj haujlwm yog tias kuaj dhau lawm xwb yuav tsum siv tib hom kev kuaj.

      Lub chaw haujlwm hloov siab tau rau kev muab haujlwm yog tias koj tsis kam mus kuaj lossis yog koj kuaj tsis dhau. Lawv thim tsis tau txoj haujlwm muab rau koj tsuas yog vim kuaj pom koj siv tshuaj maj xwb. Yog lawv hloov siab lawm, lawv yuav tsum tau qhia koj tias yog vim li cas thiab sau ntawv tuaj qhia txog koj cov cai uas koj muaj los piav thiab cav txog qhov uas kuaj tau ntawd. Yog koj kuaj tau tias siv yeeb tshuaj lossis dej caw, koj hais tau kom rov kuaj dua, tiamsis koj lub chaw haujlwm hais tau kom koj them. Yog koj xav rov kuaj dua, koj yuav tsum sau ntawv mus qhia lub chaw haujlwm ua ntej dhau 5 hnub ua haujlwm ntawm hnub uas lub chaw haujlwm tau qhia rau koj tias koj kuaj tsis dhau thawj qhov kev kuaj.  

• Kev Kuaj Mob

          Lub chaw haujlwm tsuas hais tau kom koj mus kuaj mob tom qab lawv twb muab txoj haujlwm rau koj lawm.  Txhua tus neeg xamphaj rau tib txoj haujlwm li koj txoj yuavtsum raug nug kom mus kuaj tib hom kuaj li koj. Lub chaw haujlwm yuav tsum them rau kev kuaj.  Yog kuaj tau tias koj yuav ua tsis tau feem ntau ntawm txoj haujlwm, lawv thim tau tsis ntiav koj.  Lawv yuav tsum qhia rau koj tias yog vim li cas lawv txiav txim li ntawv kom tsis pub dhau 10 hnub ntawm kev txiav txim.

• Xaim Oob Qhab thiab Kev Mob

          Lub chaw haujlwm hloov tau siab tsis ntiav koj yog tias koj yuav ua tsis tau qhov tseem ceeb ntawm txoj haujlwm vim kev muaj mob ntawm lub cev lossis txoj kev xav.  Yog koj muaj kev xiam oob qhab tiamsis yeej tseem ua tau txoj haujlwm nrog “kev pab haujsim” lub chaw haujlwm yuav tsum tau muab cov kev pab ntawd rau koj.  (Saib hauv qab.)  Tiamsis, lub chaw haujlwm hloov tau siab tsis ntiav koj yog tias koj kev xiam oob qhab ntawd yog ib qho loj uas yuav ua raug tsis zoo rau kev noj qab haus huv thiab kev nyab xeeb ntawm chaw haujlwm.

• Kev Pab Haujsim

          Yog koj muaj kev xiam oob qhab, lub chaw haujlwm yuav tsum tsim kom muaj “kev pab haujsim” yog tias yuav tsum muaj los pab koj ua haujlwm.  Cov kev pab no yuav tsum txhob yog tej yam “tsim kev nyuaj hnyav” rau lub chaw haujlwm.  Qhov no txhais tias lub chaw haujlwm yuav tsum hloov tej yam nyob rau lub chaw haujlwm lossis cov txheej txheem haujlwm.

 Piv txwv, yog hais tias koj yuav tsum tau sijhawm ntxiv so mus siv chav dej lossis yuav tsum hloov cov sihawm ua haujlwm mus ntsib kws kho mob, tej zaum cov no yuav yog cov kev yuav hloov tau kom haum koj. Yog koj ua tau feem ntau ntawm txoj haujlwm nrog cov kev pab haujsim no, txoj haujlwm lawv muab rau koj lawm yuav raug tshem tawm tsis tau vim txoj kev xiam oob qhab.