Kuv Puas Raug Mus Kaw Nkuaj Yog Kuv Tsis Them Kuv Cov Nuj Nqis?

Nyob rau hauv Minnesota koj tsis raug mus kaw nkuaj yog koj tiv nyiaj xwb. Tabsis yog koj muaj ib tsab ntawv yuam kom them nyiaj thiab koj tsis ua raws tsab ntawv yuam los tom tsev hais plaub lossis tsis mus tom tsev hais plaub raws tsab ntawv yuam, koj muaj feem raug ntes vim koj tsis mlooj tsev hais plaub.

Coob tus neeg tsis paub tias lawv muaj ib tsab ntawv yuam kom them nyiaj. Yog koj tsiv tsev ntau zaus tej zaum koj yuav txais tsis tau cov ntawv no. Lossis tej zaum koj tsis quav ntsej cov ntawv no vim koj tsis paub tias yog dab tsi.

Yog koj tiv nyiaj thiab poob qab them koj cov nuj nqis, tej zaum yog ib lub tswv yim zoo tiv tauj tus neeg/qhov chaw uas koj tshuav nqi. “Creditors” yog cov neeg lossis tuam txhab uas koj tshuav nqi rau. Tej zaum koj yuav tsim tau ib txoj hau kev ua hli them zuj zus thiab zam tsis raug tsab ntawv yuam them nyiaj.

Nws tseem ceeb heev koj saib cov ntaub ntawv xa tuaj rau koj zoo zoo. Feem ntau cov nuj nqis koj tiv muab mus rau lwm lub tum txhab thiab tej zaum koj yuav tsis paub cov npe tuam txhab ntawm cov ntaub ntawv. Yog koj tau ntawv tuaj ntawm tsev hais plaub, nco ntsoov teb thiab ua kom zoo. Luam txhua tsab ntawv khaws cia.

Kauj Ruam 1:   Tus neeg/qhov chaw koj tshuav nqi lossis lub koomhaum sau nyiaj mus ua ib ntsab ntawv foob koj hauv tsev hais plaub yuam koj them nyiaj. Muaj kauj ruam lawv yuav tsum ua ua ntej tau tsab ntawv yuam kom koj them nyiaj. Nyeem peb tsab ntawv qhia Koj Cov Cai Txog Kev Sau Nuj Nqis Tiv.

Kauj Ruam 2:   Tus neeg/qhov chaw koj tshuav nqi xa tsab ntawv hu uas Financial Disclosure Form tuaj rau koj. Thaum txais tau tsab ntawv koj muaj 10 hnub los teb thiab xa rov qab mus rau tus neeg/qhov chaw koj tshuav nqi.

Kauj Ruam 3:   Yog koj tsis teb tsab ntawv tiav thiab tsis xa rov qab mus rau tus neeg/qhov chaw koj tshuav nqi, lawv muaj feem mus ua ib tsab ntawv foob tom tsev hais plaub hu “Order to Show Cause.” Tsab ntawv yuam los ntawm tsev hais plaub hais tias koj yuav tsum teb tsab ntawv LOSSIS mus tom tsev hais plaub qhia vim li cas koj thiaj tsis teb tsab ntawv. Tsab ntawv mus hais plaub muaj hnub tim thiab sijhawm koj yuav tsum mus tom tsev hais plaub.

Kauj Ruam 4:  Yoj koj tsis mus hais rooj plaub LOSSIS tsis teb tsab ntawv Financial Disclosure Form kom tag thiab xa mus rau tus neeg/qhov chaw koj tshuav nqi, lub tsev hais plaub muaj feem ua tsab ntawv qhia tias koj tsis mloog tsev hais plaub vim koj ua txhaum tsab ntawv.

Kauj Ruam 5:   Tsab ntawv ntes koj los ntawm qhov teeb meem koj tsis mloog hauv tsev hais plaub daim ntawv. Tub ceev xwm muaj feem ntes thiab kaw koj. Zam kom tsis txhob raug ntes! Mus hais koj rooj plaub! Teb txhua tsab ntawv koj txais tau! Yog koj yuav tsum teb cov ntawv nyob hauv nkuaj tej zaum koj yuav tsis muaj tag nrho cov ntaub ntawv koj xav tau los teb cov lus kom yog.

Nws nyuaj heev yog xav paub tias puas muaj ib tsab ntawv ntes koj los ntawm lub tsev hais plaub vim koj tsis mloog tsev hais plaub los ntawm rooj plaub pej xeem sib foob nyiaj. Nws muaj ob txoj hau kev koj muaj feem mus nrhiav kom paub.

Koj muaj feem hu rau tub ceev xwm lub hoobkas hauv koj lub nroog. Nug txog chav ua hauj lwm ua ntawv ntes neeg. Lawv yuav tsum qhia tau hauv xov tooj yog muaj ib tsab ntawv ntes koj.

Koj muaj feem tshawb hauv Minnesota Court lub vassab. Mus rau: www.mncourts.gov (lus Askiv xwb).

1. Nias ntawm Access case Records (ntawm qhov xaiv sab saum toj).
2. Nias ntawm Minnesota District (Trial) Court Case Search
3. Swb mus hauv qab mentsis thiab nias lub thawv muaj npe Minnesota Court Records Online (MCRO).  
4. Ntawm nplooj tshiab uas qhib nias lub npov hu uas Access MCRO. Nyeem cov terms and conditions ntawm nplooj ntawv tom ntej. Yog hais tias koj pom zoo txais cov nqe lus, nias qhov I Accept the Above Terms & Conditions hauv qab lub thawv. 

5. Click Nias ntawm qhov hais tias Case Search.  Koj kuj yuav tsum mus xyuas hauv qab Judgments Search uas nyob saum toj. Ntaus koj lub npe rau hauv mus tshawb. 

6. Yog muaj cov rooj plaub sau ntawm, nias rau txhua rooj plaub seb puas pom tsab ntawv ua ntes koj.  

CIM CIA: Yog koj lub npe tsis nyob hauv cov ntaub ntawv no, tej zaum nyuam qhuav ua tsab ntawv txiav txim ntes koj tsis ntev es tsis tau muab sau cia rau hauv lub tsev hais plaub.

Yog muaj tsab ntawv ntes koj vim tias koj tsis tau teb tsab ntawv Financial Disclosure Form, hu lub tsev hais plaub ua tsab ntawv ntes koj. Feem ntau yog koj lub tsev hais plaub hauv nroog. Qhia tus neeg lis ntaub ntawv tias koj yuav tsum tau teb tsab ntawv Financial Disclosure Form. Tej zaum lawv yuav xa tau tsab ntawv tuaj rau koj.

Muaj tsab Financial Disclosure Form txuas nrog. Koj muaj feem nrhiav hauv online ntawm www.mncourts.gov (lus Askiv xwb). Nias rau Get Forms, nias rau Judgement Enforcememnt, nias rau Disclosure, nias rau Financial Disclosure.

Teb tsab ntawv thiab luam ib daim khaws cia. Xa ib tsab ntawv luam mus rau tus neeg/qhov chaw koj tiv nyiaj) thiab khaws ib daim cia rau koj tus kheej. Tom qab ib ob hnub, hu lub tsev hais plaub kom paub tseeb seb puas tau muab tsab ntawv ntes koj tshem tawm.

Nws txawv ib lub nroog mus rau ib lub nroog. Nug lub nkuaj kaw kom muab tsab ntawv Financial Disclosure los koj teb yog koj tsis tau ua.

Teb tsab ntawv thiab nug seb lawv puas kam tso koj tawm nkuaj. Tus kws txiav txim mam li txiav txim seb puas tsim nyog tso koj tawm.