Neeg Koom Chaw Nyob Uake

Read this in

English

Spanish / Español

Hmong / Hmoob

Somali / Soomaali

Tus sau

Education for Justice

Zaum kawg kho Tshiab

03/2024

Try our Quiz

After you're done reading this page, take a short quiz to test what you've learned!

Daim ntawv qhia no tham txog nrog lwm cov neeg nyob uake, leejtwg yuav tsum muaj npe nyob hauv daim ntawv xauj tsev, yog leejtwg luaj hawjlwm them nqi tsev, fais fab, cua sov/txias, cua ua noj, dej thiab rau ntiab tawm tsev.

Ceevfaj thaum xaiv ib tug neeg nrog yus koom chaw nyob uake.

Leejtwg yuavtsum muaj npe rau daim ntawv xauj tsev?

Txhua tus uas sib koom chaw nyob uake yuavtsum muaj npe rau hauv daim ntawv xauj tsev. Yog koj muaj ib daim ntawv xauj tsev uas sau cia lawm, koj tsis muaj cai txais tib neeg los koom nyob hauv yog tias tsis tau lus tso cai los ntawm tus tswv tsev. Yog koj ntxiv lossis hloov ib tug neeg koom chaw nyob uake, mus nrog tus tswv tsev tham txog hloov daim ntawv xauj tsev. Yog koj tsis muaj ib daim ntawv xauj tsev sau cia, tejzaum koj tsis tas yuav tau tus tswv tsev lus tso cai, tiamsis yog ib yam tswvyim zoo nug txog. Tsis li ntawd, tus tswv tsev muaj feem muab ntaub ntawv kom koj tsiv tawm.

Kuv puas raug ris cov khoom uas tus neeg nrog kuv koom chaw nyob uake ua?

Leejtwg txoj luag hauj lwm them nqi tsev?

Txhua tus neeg koom chaw nyob uake yuav muaj feem ris tagnrho tus nqi tsev, tshwj tias koj ho muaj ntaub ntawv xauj tsev hais txawv qhov no. Yog tus neeg nrog koj koom chaw nyob uake tsis them nqi tsev, lossis tsiv tawm, koj tus tswv tsev muaj feem hais kom koj them tagnrho. Yog koj tsis them, koj muaj feem raug ntiab tawm. Yog tsis xav raug li no, koj muaj feem sau rau daim ntawv xauj tsev tias txhua tus neeg koom chaw nyob uake nyias tsuas ris nyias tus nqi tsev ntawm tus kheej xwb. Coob leej tswv tsev yuav tsis pom zoo rau qhov no.

Nco ntsoov txhua zaus them nqi tsev, khaws daim ntawv povthawj tus tswv tsev kos npe thiab sau hnub koj them nqi tsev rau – tsis hais tias koj them rau ib tug neeg koom chaw nyob uake lossis rau tus tswv tsev. Yog koj them nrog daim tshev “money order”, koj yeej tseem yuav tau kom tus tswv tsev muab ib daim ntawv povthawj rau koj!

Leejtwg txoj luag hauj lwm them nuj nqis fais fab, dej, cua sov/txias?

Yog koj tso koj lub npe rau qhov chaw them nuj nqis, koj yog tus ris tagnrho cov nqi. Tiamsis, yog tias tsuas muaj 1 lub meter ntsuas rau 2 lossis ntau dua chav xauj, tus tswv tsev feem ntau yog tus ris. Mus saib peb daim ntawv qhia tseeb Koom Cov Tshuab Ntsuas Fais Fab, Nkev, thiab Dej.

Tej zaum lub tuam txhab nuj nqis tsev yuav qhia rau koj tias txhua tus neeg koom chaw nyob uake raug ris tagnrho tus nqi ntawm, txawm hais tias lawv lub npe tsis muaj nyob rau ntaub ntawv. Peb tsis pom zoo li no. Peb xav tias tsuas yog tus neeg muaj npe nyob daim nqi thiaj li yog tus ris lub luag haujlwm xwb. Yog tias lub chaw nuj nqis xovtooj, nkev, fais fab, lossis dej xav kom koj them ib daim nqi, tiamsis koj yeej tsis tau pom zoo muab koj lub npe nyob rau daim nqi ntawd, mus nrog koj lub hoobkas kev cai lij choj legal aid tham. Hu koj lub legal aid hoob kas hauv zos ntawm 1(877) 696-6529.
Tham nrog cov neeg koom chaw nyob uake seb leejtwg lub npe yuavtsum nyob rau cov ntaub ntawv nuj nqis. Yog koj lub npe nyob rau cov ntaub ntawv, tseg kom tau nyiaj txuas los them tagnrho daim nqi txhua hli, tsam ho muaj tej tug neeg koom nyob uake uas tsis them nws feem.
Yog koj tsis them, koj yuav raug them nqi lig, tau npe them nuj nqi (credit) tsis zoo, lossis tej fais fab, dej, thiab nkev raug kaw tau.

Koj muaj feem teem txoj kev npaj them nqi nrog lub tuam txhab nuj nqis, kom txhua lub hlis koj tsuas them tib tug nqi qub xwb. Yog ua li no, txhua tus neeg koom chaw nyob uake paub tias ib tug them pestsawg txhuas lub hlis.

Thaum koj hu mus tauj fais fab, dej, thiab nkev lawv yuav nug koj seb leejtwg nrog koj nyob. Koj tsis tas yuav qhia rau lawv.

Yog koj tsis xav kom muab koj lub npe nyob rau daim nqi, ces tsis txhob xa ib daim tshev uas muaj koj npe mus rau lub tuam txhab nuj nqis. Hais kom cov neeg nrog koj koom chaw nyob uake tsis txhob muab koj lub npe mus rau lub tuam txhab nuj nqis. Thiab nco ntsoov saib cov ntaub ntawv nuj nqis txhua hli kom koj lub npe tsis txhob nyob rau.

Yog koj tsiv mus koom nyob nrog ib tug neeg uas muaj ib daim nuj nqis tsis tau them thiab tauj tsis tau fais fab, dej, thiab nkev koj muaj feem mus tauj tau ua koj lub npe. Yog lawv tsis kam tauj rau koj, hu mus rau cov chaw kev cai lij choj legal aid.

Qhov koj ua tsis tau yog “hloov npe ntaub ntawv nuj nqis.” Hloov npe ntaub ntawv nuj nqis txhais tau tias cov neeg sib koom chaw nyob uake siv tej nuj nqis siab siab ua ib tug npe tas ces, muab ntaub ntawv nuj nqis hloov mus rau lwm tus neeg koom chaw nyob uake lub npe thaum tus neeg uas tsis them daim nqi tseem nyob hauv lub tsev ntawd.

Kuv yuavtsum ua dabtsi thaum kuv tsiv tawm?

Sau ntawv kom raws sijhawm mus qhia koj tus tswv tsev. Yog koj muaj ntaub ntawv xauj tsev, saib seb yuavtsum muab sijhawm ntau licas qhia paub ua ntej. Yog koj tsis muaj ntaub ntawv xauj tsev, tus tswv tsev yuavtsum tau txais koj daim ntawv qhia kom txwm ib hlis ua ntej koj tsiv tawm. Xws li hais tias, yog xav tsiv tawm lub 7 hlis tim 31, koj yuav tau sau ntaub ntawv qhia koj tus tswv tsev rau thaum lub 6 hlis ntuj.

Sau ntawv mus rau txhua lub tuam txhab nuj nqis paub uas muaj koj npe nyob rau tej ntaub ntawv thiab qhia rau lawv kom hloov koj cov ntaub ntawv mus rau qhov chaw nyob tshiab lossis muab tshem tawm. Yuavtsum sau ua ntaub ntawv thiab khaws ib daim tseg kom koj muaj povthawj cia. Yog koj tsis qhia rau lawv paub, koj yeej tseem raug ris cov neeg koom chaw nyob uake lawv cov nuj nqis.

Kuv ntiab puas tau ib tug neeg nrog kuv koom chaw nyob uake tawm?

Feem ntau tsuas yog tus tswv tsev thiaj li ua tau ntaub ntawv ntiab neeg tawm tau xwb. Koj muaj feem nug kom koj tus tsev tsev ua daim ntawv ntiab neeg tawm uas tsuas sau tus neeg koom chaw nyob uake ntawd lub npe xwb, tsis sau koj rau hauv, tiamsis qhov no tej zaum yuav tab kaum thiab nyuab.

Yog tus neeg nrog koj koom chaw nyob uake hawv koj, thab zes koj, lossis ua phem rau koj, mus ua daim ntawv tiv thaiv koj “Order for Protection” (OFP) lossis daim ntawv tsis pub thab zes koj “Harassment Order”. Lub tsev txiav txim plaub muaj feem tswj kom tus neeg koom chaw nyob uake nrog koj yuavtsum nyob nrug deb ntawm lub tsev kem. Mus saib peb daim ntawv qhia tseeb Ntawv Tiv Thaiv thiab Ntawv Txwv Tsis Pub Thab Los Ze.