Rov Mus Nqa Khoom Tom Qab Koj Tsiv Tawm

Yog koj raug ntiab tawm, tsiv tawm, lossis khiav koj lub tsev thiab koj tso tseg koj tej yam khoom cia, muaj ib co cai hais txog qhov tus tswv tsev muaj feem ua li cas rau cov khoom ntawd. Tus tswv tsev tsis muaj feem muab povtseg rau nraum zoov.

Cov cai muaj ua raws li no yog koj tsiv tawm thiab tseg khoom tom qab. Tsis hais seb yog muaj ib rooj plaub hauv tsev hais plaub txog kev ntiab tawm los tsis muaj, lossis seb yog vim koj tus tswv tsev kom koj tsiv tawm, lossis koj yog tus txiav txim tsiv tawm.

• Tus tswv tsev yuavtsum tau muab koj cov khoom rov qab rau koj tsis pub dhau 24 teev ntawm lub sijhawm koj tau nug kom muab rov qab. Koj yuavtsum tau sau ntawv mus nug nws. Koj muaj feem sau ntawv hauv xov tooj mus, sau email lossis sau ua ib tsab ntawv. Cov hnub txwv tsis pub dhau no tsis suav cov lim tiam xaus lossis suav cov hnub uas so tsis ua haujlwm. Sau hnub tim rau koj daim ntawv hais khoom rov qab thiab luam ib daim khaws cia. Tejzaum koj kuj yuav xav muab xa ua ntaub ntawv uas yuav tau kos npe thaum txais tau lossis nrhiav neeg ua timkhawv pom koj xa daim ntawv kiag. Qhia kom meej rau tus tswv tsev hauv koj daim ntawv tias hnub tim thiab lub sijhawm koj xav tau koj cov khoom rov qab.
   
• Tom qab 28 hnub, tus tswv tsev muaj feem muab koj tej khoom muag lossis povtseg. Tus tswv tsev yuavtsum tau sau ntawv qhia koj 14 hnub ua ntej nws muag. Yog lawv tus kheej tsis yog tus uas nqa daim ntawv tuaj rau koj, lawv yuav tau muab xa tuaj rau qhov chaw uas lawv paub tias koj nyob dhau los thiab muab lo kom ntev li 2 lim tiam. 
   
• Yog tswv tsev muab koj cov khoom pov tsev ua ntej uas tsis muab muag, lawv tsis tas yuav qhia rau koj paub. Tiamsis lawv yuav tau tos ntev li 28 hnub ua ntej muab pov tseg.
   
• Yog koj cov khoom yeej raug khaws cia rau hauv lub tsev koj nyob, koj tsis tas yuav tau them nyiaj kom rov mus nqa los. Koj tus tswv tsev tsis muaj cai tuav koj cov khoom cia kom txog thaum koj them nqi xauj tsev lossis cov nqi uas koj tseem tsis tau them tag. Tiamsis koj tus tswv tsev muaj feem hais kom koj them rau lub sijhawm nws muab koj tej khoom tshem tawm lossis them nqi xauj chaw tso koj cov khoom.
   
• Yog koj rau ntiab tawm, tus tswv tsev yuavtsum tau sau ntaub ntawv kom ntxaws txog txhua yam uas yog koj li thaum uas tub ceevxwm tuaj nyob ntawd saib. Daim ntawv yuavtsum qhia txog tias txhua yam khoom zoo licas. Yuavtsum muaj lub npe thiab tus zauv ntawm tus tub ceevxwm uas tuaj ntawd. Koj thiab tus tub ceevxwm yuavtsum ob leeg tau daim ntawv no.

Koj tus tswv tsev yuavtsum tau ua raws li cov cai uas muaj nyob rau saud TIAMSIS tsuas muaj 48 teev (tsis yog 24 teev) muab kom tag koj cov khoom rov qab rau koj.

• Tus tswv tsev yuavtsum tau muab koj tej khoom rov qab rau koj tsis pub dhau 48 teev ntawm lub sijhawm koj tau nug kom muab rov qab. Koj yuavtsum tau sau ua ntaub ntawv nug cov khoom rov qab. Cov hnub txwv tsis pub dhau no tsis suav cov lim tiam xaus lossis suav cov hnub uas so tsis ua haujlwm. Sau hnub tim rau koj daim ntawv hais khoom rov qab thiab luam ib daim khaws cia. Tejzaum koj yuav tau xa ua kom muaj ntaub ntawv uas yuav tau kos npe thaum txais tau lossis coj neeg ua tim khawv pom  koj xa daim ntawv kiag.
   
• Tus tswv tsev yuavtsum tau saib xyuas koj cov khoom mus li 60 hnub. Tom qab ntawd tus tswv tsev muaj feem muag tau koj cov khoom. Lawv yuavtsum sau ntaub ntawv qhia koj 3 lim tiam ua ntej yuav muab khoom muag. Yog lawv tus kheej tsis yog tus nqa daim ntawv tuaj rau koj, lawv yuav tau muab xa tuaj rau koj qhov chaw, yog tias lawv paub, thiab muab tshaj tawm rau ntawv xovxwm, lossis muab lo rau 3 qhov chaw uas pejxeem pom.
   
• Koj yuavtsum tau them tus tswv tsev rau cov nqi uas tshem koj tej khoom tawm thiab muab tso rau ib lub chaw xauj yog tias koj rau ntiab tawm los ntawm tsev hais plaub thiab tus tub ceevxwm tuaj kom koj tawm. Qhov no tsuas yog hais txog qhov uas yog lawv tshem koj cov khoom tawm mus tso rau lwm qhov chaw xwb. Koj tus tswv tsev muaj feem yuam kom koj them nyiaj ua ntej koj yuav tau koj cov khoom rov qab. Cov nqi them ntawd yuavtsum raws nqi haujsim.

Koj tseem muaj feem tau koj cov khoom rov qab yog tias koj tiv tus tswv tsev nyiaj los ntawm lub sijhawm koj nyob qhov chaw ntawd nrog rau nqi xauj tsev, lwm yam nqi, lossis nqi hais plaub. Tus tswv tsev muaj feem nug txog cov nyiaj tiamsis tsis muaj feem yuav koj cov khoom vim qhov uas koj tsis tau them.

Tus tswv tsev muaj feem siv cov nyiaj los ntawm kev muag cov khoom coj los them them nqi tsiv khoom tawm thiab khaws khoom cia lossis rau lwm cov nqi uas koj tseem tiv. Koj muaj feem nug txog cov nyiaj uas seem. Sau ib tsab ntawv mus rau tus tswv tsev tias koj xav tau cov nyiaj seem ntawd. Luam ib daim khaws cia.

Yog tias tus tswv tsev tsis kam muab koj cov khoom rov qab, koj muaj feem mus foob nws rau chav Tsev Hais Plaub Neeg Sib Foob Neeg hu uas “Conciliation Court”. Koj yuavtsum muaj povthawj rau txhua yam uas tus tswv tsev muab mus lawm thiab muaj povthawj ntawm cov nyiaj uas koj tau siv rov los yuav cov khoom uas koj tso tsis tau tseg, xws li tej tshuaj noj lossis cov cuab yeej siv ua haujlwm. 

Koj muaj feem nug kom them cov nqi kws lijchoj thiab nplua txog ob npaug ntawm qhov raug koj lossis txog $1,000, seb qhov twg ntau dua. Mus saib peb daim ntawv qhia tseeb, Chav Hais Plaub Pej Xeem Sib Foob yog koj tseem tiv tus tswv tsev nyiaj, tus tswv tsev muaj feem rov tig foob koj rau cov nyiaj ntawd hauv tsev hais plaub neeg sib foob neeg.

Yog koj raug ntiab tawm nyob rau Hennepin lossis nroog Ramsey, koj muaj feem rov mus rau chav Tsev Hais Plaub Vajtse hais rooj plaub no, uas tsis tas yuav rov mus ua ntawv foob ib rooj tshiab rau hauv chav Tsev Hais Plaub Neeg Sib Foob Neeg.