Cov Qhua uas Nyob Ntev Dhau

Koj puas muaj leejtwg nyob hauv koj tsev es hais kom lawv tawm nyuaj kawg li? Tej zaum nws yog ib tug phoojywg lossis txheeb zes uas ntsib teebmeem lossis ib tug menyuam muaj hnoob nyoog uas tsis tau tsiv tawm. Nov yog tej yam muab los xav thaum txiav txim siab tias yuav kho qhov no li cas. Zoo dua yog tias mus nrog ib tug kws lij choj tham vim txhua rooj plaub nyias txawv nyiam.  

Nco Cia: yog raug teebmeem los ntawm koj tus qhua lossis ntshai rau koj txoj kev ruaj ntseg, hu rau 911. Xav seb puas yuav ua daim Ntawv Tiv Thaiv (OFP) lossis daim Ntawv Txwv Tsis Pub Thab (HRO). Saib peb daim ntawv qhia tseeb Ntawv Tiv Thaiv thiab Ntawv Txwv Tsis Pub Thab Los Ze.

Sim sib tham kom muaj chaw haum nrog koj tus qhua. Yog koj los zaum sib tham, tej zaum koj yuav tawm tau ib lub tswvyim lossis nrhiav tau ib txojkev uas haum rau sawvdaws. Yog koj sib kho tau ces tsis tau hais kom tub ceev xwm lossis tsev hais plaub cuam tshuam. 

Hais kom tus qhua tawm. Xaiv ib hnub uas muab sijhawm txaus rau lawv los tu khoom thiab nrhiav ib qho chaw tshiab mus nyob. 

Yog tus qhua tsis xav tawm mus, xav seb puas muab mentsis nyiaj los pab nws yog tias koj muaj. Qhov no tsis txim yog li, tabsis yog koj yuav tau mus hais kom tsev hais plaub muab lawv ntiab tawm ces yuav raug nyiaj ntau tshaj.   

Hais rau koj tus qhua hais tias koj tsuas pab kom lawv tsis txhob raug ntes lossis muaj ntaub ntawv ntiab tawm tsev nyob hauv lawv qhov keebkwm. 

Yog tham sib haum, muab sau cia. Sau txhua nqe nej tham sib haum es thiaj tsis muaj kev tsis nkag siab tom qab yog hais tias koj tus qhua tsis ua raws li hais. 

Tej zaum mas, tus neeg nyob hauv koj lub tsev saib tias nws yog ib tug neeg xauj tsev. Txawm yog hais tias lawv tsis tau xee daim ntawv xauj tsev lossis them nqi tsev, tej zaum lawv kuj yog tus neeg xauj tsev raws li txoj kevcai. 

Minnesota txoj cai hais tias ib tug neeg xauj tsev yog ib tug neeg tus tswv tsev tso cai nyob hauv nws lub tsev. Feem ntau, tabsis tsis yog txhua zaum, los nyob pauv them nqi xauj tsev lossis pab lwm yam. Tej zaum koj twb yog ib tug tsev tswv es tsis paub txog!  Tej yam uas qhia hais tias koj tus qhua yog tus neeg xauj tsev los tsis yog:   

• Lawv puas muaj lub tsev nyob ruaj rau lwm qhov chaw?
• Lawv nyob nrog koj ntev li cas lawm? 
• Lawv puas pab hauv vaj hauv tsev, nyiaj txiag lossis lwm txoj kev?

TSEEM CEEB: Yog koj tus qhua los ua ib tug neeg xauj tsev lawm, koj tsuas yuam tau lawv tsiv yog mus ua daim ntawv ntiab tawm tsev hauv tsev hais plaub. 

Yog koj tus qhua tsis yog ib tug neeg xauj tsev, thiab lawv tsis kam tawm koj lub tsev, tej zaum yuav txhais tau tias lawv tuaj hauv koj lub tsev tsis raws kevcai lawm. Koj hu tub ceevxwm tau, tabsis tej zaum yuav nyuaj vim tsis muaj povthawj rau tub ceevxwm hais tias koj tsis tso lus rau tus neeg ntawd nyob hauv koj lub tsev lawm. 

Tej zaum vim koj tso lus rau tus qhua los nyob hauv koj lub tsev thaum pib lawm, nws yuav yog ib qhov zoo tswvyim yog koj sau ntawv qhia nws tias, “Kuv rov thim kuv qhov kev tso lus rau koj los nyob hauv kuv lub tsev. Thov nqa koj cov khoom thiab tawm mus tsis pub dhau lub sijhawm (sau ib lub sijhawm kom yuav taus).”

Muab ib daim luam rau lawv thiab luam ib daim tseg rau koj tus kheej. Yog txog hnub ntawd es lawv tsis tawm, koj hu tau tub ceevxwm kom lawv tuaj tshem tus neeg vim nws nyob tsis raws kevcai lawm. Koj muaj daim ntawv sau qhia ua povthawj hais tias koj twb hais kom lawv tawm tsev lawm.  

Yog tub ceevxwm tshem tus qhua tawm, tej zaum lawv yuav muaj ntaub ntawv raug ntes nyob hauv nws qhov keebkwm.

Tej zaum tub ceevxwm yuav tsis tshem lawv tawm thiab. Tej zaum lawv yuav hais tias lawv yuav tsis txiav txim siab tias koj tus qhua yog ib tug tuaj raws kevcai los tsis raws. Tej zaum lawv yuav hais rau koj tias lub tsev hais plaub thiaj li yuav txiav txim tau.

Yog koj yuav kom tsev hais plaub ntiab ib tug neeg tawm tsev, tej zaum koj yuav tau qhia kom tau tias tus neeg koj xav ntiab tawm yog “ib tug neeg xauj tsev” thiab koj yog “tus tswv tsev.” Koj yuav tau qhia tej yam zoo li nov: 

• nqi tsev tsis them
• lawv tsis ua li daim ntawv xauj tsev, lossis
• lawv nyob dhau lub sijhawm koj tso cai rau lawv lawm. 

Tej zaum koj kuj hais tau tias tus neeg nyob tsis raws kevcai ces tsis tas hais tias tus neeg ntawd yog tus neeg xauj tsev. 

Txoj txheej txheem ntiab neeg tawm tsev siv sijhawm ntev tau li ob peb lub lim tiam lossis ob peb lub hlis thiab tus nqi tsawg kawg yog $285. Zoo dua yog koj mus ntsib ib tug kws lij choj pab muab tswv yim ua ntej koj mus ua ntawv hauv tsev hais plaub ntiab neeg tawm tsev.  

Yog koj tau nyiaj tsawg, koj ua daim ntawv thov kom tsev hais plaub tshem tawm tus nqi ua ntaub ntawv (IFP) es thiaj tsis tau them. Lub tsev hais plaub muaj cov ntawv no lossis koj mus ua es nug ib kauj ruam zuj zus ntawm http://www.lawhelpmn.org/forms. (lus Askiv xwb)

• Nias Court Fee Waiver (Tshem Tawm Tsev Hais Plaub tus Nqi Ua Ntaub Ntawv)  

Nqa ntawv povthawj tias tau nyiaj tsawg, xws li tw tshev ua haujlwm, lossis ntaub ntawv qhia tias koj tau nyiaj luam pab los ntawm tseem fwv. 

Nyob rau tej lub zos koj xauj tsis tau tsev yog tsis muaj daim ntawv xauj tsev. Qees zaum koj toobkas evsawslas tshwj xeeb rau lub tsev thiaj xauj tau tsev. Tshawb xyuas hauv koj lub zos. Yog koj tsis muaj tej no tabsis yuav tsum muaj, tej zaum koj yuav ntsib teebmeem ntawm kevcai lij choj. Mus nrog ib tug kws lij choj tham seb yog hais tias lees tias neb yog tus tswv tsev/tus xauj tsev no puas yog ib qhov zoo tswv yim los tsis zoo.

Qees zaus kuj zoo dua yog tias neb yog tus tswv tsev-tus xauj tsev. Qhia kom meej hais tias ib sab xav kom tau dabtsi thiab sau txhua yam lus cog tseg rau hauv ntaub ntawv.  

Raws li txoj kevcai tus tswv tsev yuav tsum sau ntawv muab sijhawm kom ntev li lub sijhawm them nqi tsev ib zaug rau nws tsiv tawm. Yog tsis muaj nqi tsev them li, tus tswv tsev yuav tsum muab sijhawm 3 lub hlis rau tus neeg xauj tsev tsiv tawm. 

Piv ntxwv:  yog tus qhua them nqi tsev rau koj thaum lub Rau Hlis tim 1, koj yuav tsum muab daim ntawv kom nws tawm tsev tsis pub dhau lub Rau Hlis tim 30 hais kom lawv tsiv tawm tsis pub dhau lub Xya Hlis tim 31.   

Yog tus neeg tseem tsis kam tsiv tawm thiab, nqa daim ntawv “Writ” ntiab tawm tsev mus rau tom tub ceev xwm “sheriff’s” lub hoobkas. Tus Tub Ceev Xwm tuaj ntiab tshem tus neeg tawm. Nco tsoom, mus ua daim ntawv foob ntiab tawm tsev yuav tshwm tawm ntawm tus neeg ntawd qhov keebkwm. Qhov no yuav ua nyuaj rau lawv mus nrhiav lwm qhov chaw nyob. 

Khaws tagnrho tej ntaub ntawv thiab lus cog tseg nrog ntawm tus qhua es thiaj muaj povthawj pab koj rooj plaub hauv tsev hais plaub. Ua ntej koj ua ntawv ntiab tawm tsev, sau naj npawb lo rau ntawm cov qhov rooj hoob txaj pw, es tus tub ceevxwm thiaj li paub hais tias tus qhua nyob rau thaj chaw twg. Tej zaum koj yuav hu rau tus kws kho qhov rooj tuaj hloov cov pob qhov rooj xauv sai li sai tau tom qab tub ceevxwm tshem tus qhua tawm lawm. Yog koj hloov cov pob qhov rooj xauv lossis tshem lawv tej khoom ua ntej tub ceevxwm tshem lawv tawm, lawv foob tau koj.

Hloov cov pob xauv qhov rooj, tua cov fais fab, dej, cua txias/sov, lossis ua lwm yam kom ib tug neeg khiav es tsis muaj ntaub ntawv tom tsev hais plaub yog ib qho txaus ntshai. Tsis pub cov tswv tsev hauv Minnesota siv tej yam “pab tus kheej” los ntiab cov neeg xauj tsev tawm. Tej zaum koj yog tus yuav raug plaub yog hais tias tus qhua hais tias lawv yog ib tug neeg xauj tsev. Yog tsis pub tus qhua los nqa lawv cov khoom lossis lawv cov khoom puas tsuaj rau qhov koj muab tso nraum zoov, tej zaum koj yuav raug foob.   

Yog koj tau nyiaj tsawg, tej zaum koj yuav tau kev pab dawb lossis them ntsawg los ntawm koj lub hoobkas legal aid. Hu koj lawv hoob kas hauv zos ntawm 1(877) 696-6529.

Lossis mus nrhiav kev pab los ntawm lwm cov kev pabcuam ntawm www.lawhelpmn.org/hm/providers-and-clinics.

Yog koj tsis muaj feem txais kev pab dawb lossis kws lij choj them nyiaj tsawg, mus nrhiav lwm tus kws lij choj ntawm nov: www.mnfindalawyer.com. (lus Askiv xwb)