Waxaa jira dhawr sababood oo keeni kara in sharciga degenaanshaha rasmiga ah LPR lagaa qaado. Kuwan soo socda ayaa ka mid ah.
1. Dembiyada. Hadii lagugu helo dembiyada qaarkood, waxaa dhici karta in sharciga lagaa qaado laguna masaafuriyo. Dhawr tusaale hadaan soo qaadano waxaa ka mid hadii lagugu helo dembi dagaal qoyska dhexdiisa ah, xadgudub galmo ah,dhuumaalaysi ku gelin ama tahriibin,dambi la xiriira daroogo,faldembiyeedka hubka,tuugada qaarkeed, iyo wax isdaba marin. Sidoo kale hadii faldembiyeed lagugu helo way kala duwan tahay sida maxkamada dembiyada qaada u eegayso iyo sida laanta socdaalku u eegayso.
- Hadii lagu xiro ama dembi lagugu helo: Waa inaad heshid qareen ah kuwa dembiyad difaaca. Qaadigu wuxuu kuu qaban karaa qareen lacag la’aan ah hadii dakhligaagu hooseeyo. Waana inaad hubisid in qareenka dembigaa kaa difacayaa uu la tashado qareen kuwa laanta socdaalka ah si sharcigaaga LPR loo bad baadiyo.
- Hadii hada ka hor dembi lagugu helay, oo maxkamada faldembiyeedku kiiskaagii mar hore xirtay: La tasho qareen kuwa laanta socdaalka ah. Qareenka laaanta socdaalku wuxuu kuu sheegi karaa hadii sharcigaaga deganaanshuhu LPR khatar ugu jiro in lagaa qaado,sidoo kale wuxuu kuu sheegayaa hadii ay jirto si arintaa wax looga qaban karo.
- Hadii aad doonaysid inaad safar ku aado meel ka baxsan Maraykanka ,laakiin hada ka hor lagu xiray ama adiga iyo boliiska dhib idin dhexmartay: la tasho qareen kuwa laanta socdalka ah ka hor inta aadan safrin. Qareenka laanta socdaalku wuxuu kuu sheegi karaa inaad dhib la kulmi doontid markaad soo noqotid eed isku daydid inaad Maraykanka soo gashid.
2. Hadii aad sheegatid inaad dhalashada Maraykanka haysatid adigoon haysan. Weligaa ha sheegan inaad dhalashada Maraykanka haysatid adigoon haysan. Waxay noqonaysaa sheegasho been ah oo sharci jebin ah hadii aad beentaa u sheegtid, laanta socdaalka, dawladda dhexe ama gobolka. Waxaa ka mid ah hadii aad isku daydid inaad shaqo ku heshid ama codaysid. Waxaa iyadana sheegashada beenta ah ka mid ah inaad kor ugu dhawaaqdid ood tiraahdid waxaan haystaa dhalashada Maraykanka, ama aad qortid ama foom ku buuxisid ama aad isticmaaashid aqoonsi muujinaya inaad dhalashada haysatid . Hadii aad si been abuur ah u sheegatid inaad dhalashada haysatid waa lagaa qaadi karaa sharciga deganaanshaha LPR waana lagu masaafurin hadii aad si been abuura u sheegatid inaad dhalashada Maraykanka haysatid.
3. Ha Codaynin. Hana isu diiwaan gelinin inaad codaysid. Gobolka Minnesota, keliya waxaa codaykara ama isu diiwaan gelin kara inay codeeyaan dadka haysta dhalashada. Inta badan meelaha kale oo dhana sharcigan ayaa ka jira. Hadii aad u malaynaysid inaad u codayn kartid mid ka mid ah dadka xafiisyada u ordaya ee degaanka aad ku nooshahay, si’aad u hubusid marka hore la tasho qareen ah kuwa laanta socdaalka inta aadan doorashada isu diiwaan gelin . Waxaa dhici karta in sharciga deganaanshaha lagaa qaado laguna masaafuriyo hadii aad si sharci daro ah u codaysid ama aad si sharci daro ah isugu diiwaan gelisid si’aad u codaysid.
4. Mudo Dheer oo Maraykanka Dibadiisa Lagu Maqnaado. Hadii aad mudo aad u dheer ka maqnaatid wadanka Maraykanka waxaa laga yaabaa inaad khatar gelisid sharcigaaga deganaanshaha iyadoo loo tixgelinayo inaad wadanka “ka maarantay” ama waxaa laga yaabaa inay kugu adkaato inaad dhalashada qaadatid. Sida caadiga ah hadii aad 6 bilood ka yar maqnaataa dhib ma laha. Marka hadii aad rabtid inaad wadanka Maraykanka ka maqnaatid mudo 6 bilood ka badan intaadan bixin la tasho qareen kuwa laanta socdaalka ah.Waxaa laga yaaba in lagaa doonayo in inta aadan wadanka ka bixin ka hor aad dalbatid ogolaanshihii aad wadanka ku soo geli lahayd markaad soo noqotid.
